DILI, STLTIMORLESTE.com – Iha tempu badak Ministeriu Edukasaun (ME) sei koloka bolsa kandidatu profesores nivel ensinu baziku neebe rekruta ona iha 2024 hamutuk 903.
Tuir Diretor Nasional Rekursu Umanu iha ME, João Amaral dehan, bolsa kandidatu profesores nivel ensinu baziku neebe mak rekruta iha 2024 Liu bá nee hamutuk 903.
“Sira nee iha tempu badak nian laran ami sei halo kolokasaun ba sira iha nibel ensinu baziku teritoriu tomak. Nee duni iha Janeiru ba oin nee ita sei haree hotu ona, no ita bele halo ona kolokasaun ba ita nian bolsa kandidatu professores sira nee,” dehan nia ba STL, Segunda (05/01/2026).
Tuir João katak, ME sei prepara hela dadus, maibe iha tempu badak nian laran sei halo kolokasaun bá bolsa kandidatu 903, hodi subtitui 1000 resin professores neebe mak tama ona iha idade reforma ninia.
“Ita sei halo kolokasaun ba ita nian bolsa kandatu professores nibel ensinu baziku neebe sei iha bolsa laran, tanba ita nian professores barak maka tama ona ba reforma, entaun sira nee mak sei subtitui fali iha reforma nian fatin,” dehan nia.
Iha fatin seluk Diretor Servisu Edukasaun Munisipiu Manatuto, Patricio da Cruz Quintao hatete, konaba kolokasaun professores ba eskola sira, nee kompetensia husi Ministeriu Edukasaun nasional nian, tanba bolsa kandidatu profesores ba ensinu baziku ninia nee balun seidauk koloka ba eskola sira.
Jornalista: Jacinta Sequeira
Editora: Domingas Gomes
