DILI, STLTIMORLESTE.com – Komando Polisia Nasional Timor Leste (PNTL) durante selebrasaun loron natal 2025 no tinan foun 2026 halao operasaun iha teritoriu nasional no rejista kazu insidente boot 3, neebe akontese iha Munisipiu Ainaro, Ermera no Baucau.
Porta Voz Komando PNTL, Superintendente Polísia João Belo dos Reis dehan, iha primeiru insidente balun neebe mak presiza ema hotu nia atensaun katak, iha operasaun boot 2 neebe maka Polísia halo, liu-liu hasoru insidente iha Munisipiu Ainaro no Ermera nian.
“Primeiru ami informa atuasaun ba insidente neebe akontese iha Ainaro identifika katak, membru PNTL nain 3 husi Komandu Munisipiu Ainaro hetan kanek, tanba hetan tiru husi arma branka, segundu suspeitu nain 10 husi parte Ainaro nian mos identifikadu, no kazu nee aprezenta ona ba Ministeriu Publiku (MP), Suai ho NUC: 0002/2026-PNSIK,” hatete Porta Voz nee liu husi konferensia imprensa iha Segunda (05/01/2026).
Nia deklara, kazu insidente seluk neebe maka akontese iha Munisipiu Ermera nian vitima identifikadu hamutuk ema nain 6 no suspeitu sei iha faze investigasaun hela identifika katak, vitima sira hetan kanek, tanba kauza husi sasan balun maka rabenta, tanba nee investigasaun sei lao hela. Atu define katak, nee gas maka nakfera ou fugetes hodi rezulta ema sira nee kanek, investigasaun sei lao hela. Kazu nee rasik aprezenta ona Ministeriu Públiku (MP).
“Kazu seluk neebe ankotese iha munisipiu Baucau, wainhira iha perturbasaun ordem publika joven sira asalta malu, polísia ataa, hafahe sira no tiru gas no gas nee rasik rabenta kona alin ida nia ain, tanba nee prosesu ba kazu nee mos sei lao hela, identifikasaun lao hela no kazu nee ami aprezenta ona ba Ministeriu Públiku (MP),” nia deklara.
Ofisias Superior PNTL nee relata mos katak, kazu ida akontese iha Munisipiu Covalima iha neebe joven nain rua ho kondisaun lanu todan, halai motor ho velosidade makaas no konsege soke malu ikus mai joven nain 2 nee mate iha fatin akontesimentu. Mate isin entrega ona ba familia hodi halao prosesu funebre.
Kazu seluk mak Diretor Diresaun Tranzitu Seguransa Rodoviaria Nasional nia oan rasik mate, tanba asidente tunggal neebe akontese iha parte Manleu nian.
Jornalista: Jeniche da Costa
Editora: Domingas Gomes
