BAUKAU, STLTIMORLESTE.com – Kompanhia SEA MOOS Timor Leste koilheta ona budu tasi neebe kuda husi grupu Lia-Luga, iha tasi area Suku Buruma, Postu Administrativu Baukau Vila, Munisipiu Baukau, no sei rekruta tan trabalhador nain 50 ho salariu US$ 150.00 kada fulan.
Nain ba kompanhia SEA MOOS Timor-Leste, Simonis da Silva esplika, ezistensia kompanhia SEA MOOS Timor-Leste daudaun atu hakat ba tinan tolu ho sertifukadu kualidade internasional, neebe ho ekipamentus kompletu halo prosesamentu ba vitima natural sira neebe tranforma husi Budu Tasi.
Tanba nee iha trimestral ikus tinan 2025 kompanhia SEA MOOS Timor-Leste liu husi Laga Salt kuda budu tasi iha tasi area Suku Buruma, neebe responsabiliza husi Grupu Lia-Luga involvimentu trabalhador lokal nain 11 no koileta iha inisiu fulan Janeiru 2026 ho rezultadu diak.
“Kompanhia SEA MOOS exporta sasan barak ba rai liur iha buruma ita hahu koileta budu tasi neebe kuda fulan rua ona ohin hasai rezultadu diak tebes iha Timor laran,” Simonis hateten ba jornalista sira, hafoin remata koilheta budu tasi iha Lia-Luga Buruma, Segunda (05/01/2026).
Nia sublina, budu tasi neebe koilheta iha Buruma sei halo prosesamentu ba vitima maibe sei halo kombinasi ho produtu seluk hanesan bani been, masin, aifuan no seluk tan neebe iha vitima no mineral ho pursentu 95 diak ba ema nia saude.
Nia fundamenta, durante funsionamentu SEA MOOS iha Timor-Leste kuaze halo ona produsaun ba produtu SEA MOOS nian hanesan vitamina natural neebe exporta ona ba nasaun avansadu sira, iha Europa no produtu SEA MOOS nuudar reprezentante produtu sira seluk husi Timor-Leste iha Association of Southeast Asian Nations (ASEAN).
“Hau foin fila husi Kambodia representante Timor-Leste iha ASEAN, hau koalia ona ho sira hotu iha ASEAN produtu atu ba Indonezia, Singapura, Malaysia, Filipina, agora ema barak prezisa ita nia produtu iha rai liur,” Simonis akresenta.
Nia deklara, SEA MOOS Timor-Leste hetan ona sertifikadu Internasional hafoin hetan teste ba produtu sira iha laboratorium Australia, tanba nee sei kontinua halo prosesamentu ba produsaun barak liu tan hodi faan ba merkadu ASEAN.
Maibe atu garante nafatin produsaun SEA MOOS nian iha merkadu Europa no ASEAN, mak SEA MOOS iha ona politika, atu halo rekrutmentu ba trabalhador kuda budu tasi nian iha territoriu tasi Timor nian, nunee bele hatan ba nesesidade kompradores nian, tanba daudaun iha deit trabalhador nain 200.
“Ba tinan oin SEA MOOS sei iha ema rihun ida servisu iha laran, iha Buruma sei halo rekrutmentu trabalhador nain 50 servisu iha nee ho salariu US$ 150.00,” Simonis informa .
Iha fatin hanesan Koordenador Grupu Lia-Luga, Adolfo da Silva hateten, koilheta budu tasi husi Grupu Lia-Luga iha rezultadu diak no oferese ona ba kompanhia atu halo prosesamentu ba produsaun SEA MOOS nian faan iha merkadu neebe prezisa. No agradese ba kompanhia nee, tanba selebra ona kontratu ho tranbalhador nain 11 husi grupu refere ba durasaun servisu tinan 1 ho salariu US$ 150.00 kada fulan no tuir planu sei halo rekrutmentu ba trabalhador nain 50 hodi kuda budu tasi iha tasi area Buruma ho salariu hanesan.
“Ami agradese tebes tanba ami asina ona kontratu nee nuudar pasu reduz dezempregu iha Buruma, ita sei bolu ita nia jovem sira neebe nangur iha Suku laran mai servisu ho salariu US$ 150.00 kada fulan,” Adolfo katak .
Tuir Koordendor Grupu nee katak, salariu US$ 150.00 kada fulan ba kada trabalhador nee seidauk sufisiente, tanba trabalhador sira servisu iha fatin risku, maibe parte kompanhia kompromete sei hadia salariu ba kada trabalhador, bainhira haree trabalhador sira nian prestasaun servisu diak.
Jornalista: Tomas Reis
Editora: Carme Ximenes
