DILI, STLTIMORLESTE.com – Diretor Servisu Investigasaun Kriminál Nasionál, Superintendente Polísia João Belo dos Reis informa, Polísia Nasionál Timor Leste (PNTL) liu husi Diresaun Servisu Investigasaun Kriminál (DSIK) kuarta (31/12/2025) foin lalais nee detein sidadaun feto ida husi Atambua, Indonézia, ho inisiál FN falsifika dokumentu hodi sai benefisiariu ba pensaun veteranu.
Nia esplika, sidadaun Indonézia nee tuir informasaun iha Tersa (30/12/2025) foin lalais nee simu ona osan veteranus, nunee iha loron kuarta (31/12/2025) atu fila ba Atambua no too iha Batugade servisu sekretu sira informa ba autoridade sira iha Batugade hodi la fo liu sidadaun referida ba Atambua, tanba sidadaun FN suspetadu envolve iha krime falsifikasaun dokumentu hodi sai benefisiariu ba pensaun Veternu.
Tanba nee autoridade Batugade komunika kedan ba Diresaun Servisu Investigasaun Kriminál Nasionál hodi ba asegura kedan suspeta referida.
“Primeiru ami hetan informasaun, ami nia informadu infiltra kleur tiha ona ba dadus sira neebe mak deskonfia sidadaun estranjeiru ou falsifikasaun poténsia mosu iha parte ministeriu relevante nian neebe ami akompanha, no ami infiltra ami nian servisu informasaun sira hodi rekolha sese mak halo falsifikasaun sira hanesan nee. Ikus mai ami deteta katak senhora neebe mensiona iha publikasaun nee envolve forte iha faktus katak ema balu husi Timor Leste fasilita ita nia inan feton nee hodi sai veteranu, mezmu ke ita nia lei ida nee rasik bandu atu simu pensaun veteranu neebe hasai,” hatete Diretor Servisu Investigasaun Kriminál Nasionál, Superintendente Polísia João Belo dos Reis ba jornalista sira liu husi konferensia imprensa, Segunda (05/01/2026).
Nia dehan, tuir prosesu identifikasaun ba kazu nee suspeita deklara katak nia iha Bilhete Identidade (BI) no nia mos iha kartaun eletoral.
Komandante Joao Belo informa, suspeita agora hela ho nia família sira iha Dili laran, maibe nia dokumentu komprovativu sira agora daudaun DNSIK asegura hela.
“Agora daudaun nia dokumentu sira ita asegura hela. Agora ita autoriza nia hela ho nia família iha Dili laran hodi hein prosesu”, nia deklara.
Nia informa, ba kazu nee polísia submete ona ba Ministeriu Públiku no suspeta nee sei enfrenta prosesu Judisiál iha Timor Leste, tanba aktu krime nee akontese iha nee.
“Neebe se deit mak komete aktu krime, kuandu akontese iha nee halo prosesu iha nee”, nia relata.
Belo informa liu tan katak, autor neebe mak fasilita sidadaun nee hodi falsifika nia dokumentu hodi asesu ba pensaun veteranu nee polísia bolu ona balun hodi submete ba prosesu investigasaun.
“Balun seidauk, maibé ami hein delegasaun kompetensia tuir mai ami sei bolu tan. Hahalok sira hanesan nuudar falsifikasaun no la valoriza mós luta nain sira neebe tuir lo-loos hetan. Ida nee ami konsidera grave no tenke hetan atensaun sériu husi estadu liu-liu parte sira ne’ebé mak prodús dokumentu sira”, nia koalia.
Komandante nee hatutan, atusaun neebe polísia halo ba sidadaun feto nee tanba iha informasaun neebe tuir infomadu polísia nian balun neebe infiltra iha komisaun verifikasaun dadus veteranus katak iha provas konkretu neebe hateten sidadaun feto ida husi Atambua halo falsifikasaun dokumentu veteranu hodi hetan pensaun veteranu, tanba nee mak polísia halo atusaun.
Nia dehan, prosesu identifikasaun ba kazu nee sei lao hela. “Iha identifikasaun nee ami sei buka tuir se se mak fasilita asaun sira hanesan nee”, nia tenik.
Belo hateten, sei halo koordenasaun ho parte Notariadu no koordenasaun ho Ministeriu Veteranu nian para bele produs buka tuir kazu sira hanesan nee, depois ba kazu sira hanesan polísia simu informasaun barak kona-ba jestaun nee.
“Suspeitu ba kazu hanesan nee sei iha, ami simu informasaun sira hanesan barak no ami sei buka tuir se se mak fasilita, ita sei halo identifikasaun ba sira”, nia afirma.
Jornalista: Jeniche da Costa
Editor: Xisto Mendonça
