BAUKAU, STLTIMORLESTE.com – Udan Been hamaten Labarik feto ida idade 8 iha Suku Fatulia, Postu Administrativu Venilale, Munisipiu Baukau.
Administrador Postu Venilale José Freitas Boavida informa, iha loron 07 Janeiru 2026 parte Postu Venilale akontese udan ho intensivu makaas hahu iha tuku 11:00 parte meudia nunee labarik refere hariis udan liu husi halimar iha valeta, maibe valenta neebe iha akumula udan been ho volume boot nunee preojudika ba ninia vida.
“Horseik la hatene hariis iha valeta ga hanusa bee lori hakfodak lori tama tiha ba natar laran mate fatin kedas, labarik feto tinan 8 nia naran bolu deit Ania,” Administrador Postu Administrativu Venilale, José Freitas Boavida ba STL liu husi telefone, Kinta (08/01/2026).
Nia konta, husi volume udan been neebe akumula iha valeta lori labarik refere ho distansia besik metru 800 husi fatin halimar too natar area Baha-Dato, Suku Fatulia.
Nia sublina, hafoin insidente nee akontese parte familia too kedas fatin hodi evakua vitima nia mate isin ba nia rezidensia iha Suku Fatulia.
“La submete ba prosesu tanba nia ida idak hariis mak mate, PNTL dehan halo notifika buat ruma laiha,” katak José Freitas Boavida
Tuir Autoridade Postu Venilale nee katak, mezmu insidente refere akontese, parte Polisia Eskuadra Postu Venilale too kedas fatin hodi rekoilha informasaun, maibe la halo notifikasaun ba ema ruma, tanba sidadaun refere mate rasik.
Relasiona insidente nee, Autoridade Postu Administrativu Venilale husu ba inan aman sira atu kuida oan sira nia movimentu iha tempu udan atu labele halimar iha udan been liu liu iha valeta no nota ou bee dalan sira, tanba udan neebe daudaun monu rai sei kontinua akontese posibilidade ho intensivu makaas bele risku ba ema nia vida bainhira halao movimentu iha fatin sira mensionadu.
Reportajen: Tomas Reis
