DILI, STLTIMORLESTE.com – Primeiru Ministru (PM), Kay Rala Xanana Gusmão halo enkontru semanal ho Prezidente Republika Jose Ramos Horta, iha hasoru malu nee koalia kona-ba situasaun rai laran neebe lao hakmatek.
Bainhira remata hasoru malu, Primeiru Ministru Kay Rala Xanana Gusmão ba jornalista sira iha Palasiu Prezidensial Nicolau Lobato, Bairo Pite, Kinta (08/01/2026) hatete, ohin enkontru dahuluk husi tinan 2026 hodi koalia kona-ba situasaun neebe akontese iha rai laran.
“Nee Primeiru enkontru 2026, tanba nee mak hau informa ba Prezidente katak situasaun iha Timor kalma, apejar iha problema oan ruma mais temi karik problema izoladu problema iha ainaro neebe izoladu, Dili iha nee iha neeba laos problema beibeik, mais iha festividade nia tempu,” dehan Primeiru Ministru Kay Rala Xanana Gusmão.
Primeiru Ministru dehan, balun halo problema tanba hemu tua hamutuk depois diskute malu iha liafuan ruma lahan malu hamosu problema, maibe ida nee laos problema boot.
Iha biban nee Prezidente Republika Jose Ramos Horta hatoo agradese ba joven hotu-hotu populasaun tomak disposizaun hotu-hotu nia neebe kria nafatin dame iha rai laran.
Aleinde nee Primeiru Ministru mos informa ba Prezidente Republika kona-ba foin lalais taka orsamentu estadu.
“Hau koalia mos ho prezidente iha meianoite 31 hau ba taka orsamentu estadu haree katak item balun ke la konsege ezekuta hotu, hau mos bolu atensaun katak ida nee sai hanesan lisaun ida, fator ida neebe bele ezije ba Governu atu haree didiak labele tau osan barak osan naton naton hodi bele ezekuta tiha, problema diak ida mak ita bele asegura hela tanba osan bele fila ba estadu,” katak Xanana.
Primeiru Ministru dehan, iha hasoru malu nee nain rua koalia kona-ba preparasaun hodi primeiru Ministru Australia neebe atu mai Timor Leste iha 28 Janeiru.
“Ami rua koalia oituan kona-ba Primeiru Ministru Australia atu mai sei prepara iha 28 fulan ida nee, prezidente mos sei kordena nafatin atu simu oinsa buat sira nee hotu ida nee importante ba ita, ita sei simu Primeiru Ministru,” katak PM.
PM dehan, informa mos ba Prezidente katak momentu ida nee kaer hela Prezidensia Guine Bissau durante tinan ida nee sei iha atividade lubuk ida haree hela tanba iha 17 Julhu sei halo 30 anos, nee duni prezidente mos dehan enkontru xefe estadu online deit, no akontese online durante Covid-19, ikus-ikus nee mos online mais haree tok ikus mai fali mak informa ba media sira.
PM Xanana dehan, konaba ASEAN mos tama tiha ona mais seidauk hotu, tanba nee Primeiru Ministru imforma hela ba Prezidente katak saida mak Governu hasai regra ASEAN nia mak se ministru ida mak ba nia tenke ba Konselhu Ministru hodi koalia ba halo saida mai mos informa, tanba buat nee laos ida-idak halo ninia.
Reportajen: Emerenciana Pinto
