DILI, STLTIMORLESTE.com – Lei Organizasaun Judisiariu fo dalan atu harii Tribunal Primera Instansia iha Munisipiu hotu, atu lori justisa hakbesik ba iha komunidade sira.
“Tuir lei numeru 25/2021, kona-ba lei organizasaun judisiaria iha artigu 22 alinha C dehan katak, treze tribunal judisial primeira infânsia naran hanesan munisipiu ou rejiaun administrativa espesial, signifika katak tuir lei tenki estabelese Tribunal sira nia sede iha munispiu sira nee hotu,” dehan Jurista Sergio Dias Quintas ba STL iha Kaikoli, Kinta (08/01/2026).
Nia hatutan, tanba nee mak karik governu define nia politika tuir lei organizasaun judisiaria hodi harii Tribunal sira iha munisipiu nee parte ida importante hodi reduz numeru kazu pendente.
“Kazu pendente kontinua numeru aas iha Tribunal, tanba numeru Juiz mak la sufisiente, maibe foin daudaun Juiz estajiariu lubuk ida mak komesa kaer ona prosesu, espera katak iha tinan 2026 bainhira sira tama ona kareira ka sai Juiz efetivu bele ajuda servisu Tribunal nian iha munisipiu sira, hodi reduz kazu krime no sivil sira,” dehan nia.
Hatan kona-ba Tribunal movel Sergio dehan, Tribunal movel nee importante, tanba bele lori justisa besik povu neebe kbiit laiha liu-liu ba sira neebe osan laiha atu desloka mai Tribunal.
Bainhira implementa Tribunal movel bele ajuda komunidade hodi konkretiza justisa neebe efisiente no efikaz.
Nia konsidera, Tribunal movel nee mos parte ida husi servisu Tribunal nian, hodi reduz kazu pendente sira nee.
Iha fatin ketak, Akademiku UNTL, Sebastiao Dos Santos dehan, justisa tenke lori besik ba iha komunidade sira neebe hela iha area remotas.
“Tempu ona atu lori justisa hakbesik ba iha komunidade sira, liu liu ba sira neebe hela dook husi kapital, tanba se julgamentu sira halao deit iha kapital, komunidade balu seidauk sente justisa hakbesik ba sira,” ehan nia.
Reportajen: Terezinha De Deus
