BAUKAU, STLTIMORLESTE.com – Eletrisidade Timor Leste, Empreza Publiku (EDTL,EP) Munisipiu Baukau, rejeita komunidade uma kain 101 iha Umakerek, Suku Seiçal, Postu Administrativu Baukau Vila, Munisipiu Baukau, neebe seidauk asesu eletrisidade.
Rejeitasaun nee hatoo husi Supervaizor EDTL, EP Munisipiu Baukau, Edgar B. da Silva ba jornalista sira iha ninia knaar fatin Vila Nova Baukau, Segunda (12/01/2026).
“Informasaun nee hau hanoin kala la loos karik, tanba hau hatene Seiçal iha Aldeia 5 nee asesu hotu ona, Umakerek nee hau hanoin Sub Aldeia karik,” dehan Edgar.
Tuir supervisor EDTL Munisipiu Baukau nee katak, Aldeia sira neebe pertense ba Suku Seiçal kuaze 100% ona ninia komunidade asesu ona enerjia eletrisidade husi EDTL no konsidera area Umakerek nuudar sub Aldeia husi aldeia sira neebe pertense ba Suku Seiçal katak, komunidade hamutuk uma kain 101 seidauk asesu eletrisidade, ekipa EDTL Munisipiu Baukau sei ba too iha terrenu halo identifikasaun hodi hatene informasaun klaru hafoin prosesu. Maibe bainhira too iha terrenu mak haree, tanba Aldeia sira neebe pertense ba Suku sira iha Postu Administrativu Baukau Vila kuaze atinji ona 100% asesu ona enerjia eletrisidade husi EDTL, EP.
“Hau hanoin pedidu seidauk tama, kuandu pedidu iha ami sei submete ba nasional para hamutuk ho nasional haree,” Edgar komenta.
Antes nee Xefe Suku Seiçal, Agus Ferdinande Carvalho katak, Suku Seiçal Aldeia Umakerek komunidade uma kain 101 seidauk asesu eletrisidade inklui mos komunidade balu husi Suku vizinhu Kaibada Makasae neebe hela iha baliza Suku.
Ba problema refere komunidade sira infrente tinan naruk ona, tanba nee Autoridade Suku iha tinan 2025 submete ona pedidu ba Eletrisidade Timor-Leste, Empreza Publiku (EDTL,EP) atu halo instalasaun fiu eletrisidade ba komunidade sira no too ohin loron seidauk iha rezultadu, maibe Supervisor EDTL, EP Munisipiu Baukau hatan seidauk simu pedidu husi Suku Seiçal.
Mezmu nunee iha loron 12 Janeiru 2026 tuir observasaun STL nian iha edifisiu EDTL, EP Munisipiu Baukau nota katak, tekniku sira prepara atu ba terenu atu halo identifikasaun ba preokupasaun refere.
(tom)
