BAUKAU, STLTIMORLESTE.com – Mezmu Ministeriu Edukasaun bandu, maibe Eskola Ensinu Baziku Sekundaria Filial Kilik Wai-Gae Kaibada Makasae simu estudante foun ba anu letivu 2026.
Diretor Servisu Munisipal Edukasaun Baukau, Afonso dos Santos da Costa hateten, liu husi karta despaisu numeru 222 DGES/ME/XII/ 2025 relasaun Diploma Ministerial numeru 23/2025 loron 13 Agostu publika ona iha Jornal da Republika, mak Ministeriu Edukasaun bandu eskola Sekundaria 3 iha Munisipiu Baukau, hanesan Eskola Ensinu Baziku Sekundaria Filial Kilik Wai-Gae Kaibada Makasae, Eskola Sekundaria Paralelu Seiçal no Eskola Sekundaria Filial Buawa, tanba numeru estudante la atinji tarjetu.
“Informasaun nee loloos nasional mak fo, estudante mak la too, loloos nee estudante ida estudante tenke 120 maibe durante nee sira la too, estadu investe makaas haree kapasidade entuan labele simu estudante foun iha tinan ida nee” hateten Afonso ba STL iha ninia knaar fatin Vila Nova Baukau, Segunda (12/01/2026).
Tarjetu neebe Ministeriu Edukasaun aplika ba kada eskola sekundariu tenke atinji numeru estudante 120 iha anu letivu ida, maibe durante nee eskola tolu refere la atinji numeru refere, tanba nee Ministeriu Edukasaun foti medida hodi bandu eskola Sekundaria 3 refere simu estudante foun iha anu letivu 2026.
“Tuir despaisu neebe ita labele simu ona, despaisu iha ona sira orienta ona dehan labele simu ida nee mak ita nia komitmentu,” Afonso katak.
Iha sorin seluk, Koordendor eskola Ensinu Sekundaria Filial Kilik Wai-Gae Kaibada Makasae, Martinho de Oliveira hateten, kona-ba despaisu husi Ministeriu Edukasaun neebe servisu Munisipal Edukasaun Baukau atribui ba eskola Kilik Wai-Gae, iha loron 17 Dezembru 2025, maibe parte eskola simu ona estudante foun hahu iha loron 13 Dezembru 2025. nomos kontinua simu estudante foun iha fulan Janeiru 2026.
“Estudante balu mos foin daudauk sira ba rejistu iha SMU 02, SMU 01, SMK sira la simu entaun ema Timor nia oan hau prontu simu para eskola,” Martinho katak.
Iha rejistu estudante foun ba anu letivu 2026, eskola Sekundaria Filial Kilik Wai-Gae simu estudante foun ba desimu anu hamutuk nain 20.
Martinho fo razaun, mesmu Ministeriu Edukasaun liu husi Servisu Munisipal Edukasaun Baukau limita eskola Sekundaria 3 iha Baukau labele simu estudante foun, maibe parte Kilik Wai-Gae durante nee seidauk simu karta despaisu husi Ministeriu Edukasaun ba asuntu refere, nunee simu estudante foun ba prosesu aprendizajem anu letivu 2026, tanba estudante hirak nee nuudar sidadaun Timor oan neebe ba rejistu naran iha eskola Ensinu Sekundaria Jeral 01 Tirilolo, 02 Vila Nova Baukau inklui Eskola Sekundaria Santo António Teulale, maibe eskola 3 refere la simu, nunee eskola Sekundaria Kilik Wai-Gae eskola povu nian obrigado tenke simu no rejistu estudante sira ba anu letivu 2026 nian.
(tom)
