DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu nain hitu (7) ho inisial GDL, DVA, FAPdS, DdS, RGBS, FdCS no FdC neebe komete krime hasoru hasoru lezadu nain rua, HdM no RRP.
Juiz lee tiha akuzasaun neebe iha, arguidu DdSR deklara katak, iha akontesimentu nee nia la iha fatin, tanba arguidu ba hemu tua hamutuk ho nia primu sira iha area Kaikoli.
Arguidu deklara, bainhira nia fila husi area Kaikoli nia haree fatuk barak los, no arguidu liu husi neeba problema iha tiha ona, nunee arguidu sira husu tanba sa mak problema no arguidu sira fila liu ba uma.
Arguidu deklara tan, antes nee arguidu no lezadu la iha problema ruma, nunee problema kona-ba akontesimentu atu baku ga tebe nee arguidu la iha konhesimentu.
Rona tiha deklarasaun Tribunal deside muda ba loron 3 fulan Fevereiru tinan 2026, hodi rona tan arguidu sira seluk.
Tuir akuzasaun katak, iha loron 01-01-2023, oras tuku 03h madrugada OTL, iha aldeia Lemorai, Suku Vila Verde, Postu Administrativu Vera kruz, Munisipiu Dili, arguidu sira ho kondisaun lanu depois ba halo barulhu iha lezadu sira nia hela fatin.
Iha altura neeba lezadu HdM toba hela, maibe rona arguidu GDL, DVA , FAPdS, FdCdS, DdSR ho nia kolega sira halo barulhu, tanba nee lezadu sai ba hodi hase dehan “nusa mak imi mai hakilar fali iha nee”.
Bainhira koalia hanesan nee arguidu GDL hatan ho liafuan tolok no derepente arguidu DVA lori liman hodi tuku kedas dala rua iha lezadu nia kanuruk, iha tempu hanesan arguidu GDL lori liman hodi tuku dala ida iha lezadu nia kotuk laran rezulta moras.
Ho situasaun ida nee, lezadu RRP sai ba liur no haree arguidu GDL diskute malu hela ho lezadu HdM iha uma oin, tanba nee lezadu RRP ba hakalma tiha no lori arguidu GDL hodi fila ba uma, maibe lao seidauk too 15 metru hanesan nee arguidu DVA, RGBS, FdC, FdCdS, FAPdS no DdSR hein tiha ona iha dalan.
Nunee wainhira too iha neeba direitamente arguidu DVA lori liman hodi tuku kedas dala ida iha lezadu RRP nia ibun laran, rezulta ran no bubu iha lezadu nia ibun.
Iha tempu hanesan arguidu FAPdS mos lori liman hodi tuku dala ida iha lezadu RRP nia tilun hun-parte karuk, depois arguidu RGBS lori liman hodi tuku dala ida iha lezadu RRP nia kanuruk maibe lezadu la monu.
Entaun arguidu GDL lori fatuk hodi tuda kona uluk iha lezadu RRP nia matan fukun, dpois arguidu kontinua foti fatuk hodi tuda ba dala rua nian no kona iha lezadu nia matan okos parte los no tama too matan laran.
Bainhira lezadu monutun tiha ba rai mak arguidu sira seluk hanesan AGBS, FdC, FdCdS no DdSR, sira hotu halo asaun hasoru lezadu hanesan tuku, tebe no sama lezadu ba iha rai.
Konsekuensia husi arguidu sira nia konduta nee resulta lezadu HdM hetan moras tha nia kanuruk.no kotuk laran no lezadu RRP hetan kanek iha nia isin, moras no lezadu nia matan parte los la funsiona (buta total) ka difisiensia permanente.
Arguidu sira halo hahalok nee ho forma konsiente, livre, deliberada, arguidu sira hatene katak tau sira nia forsa hamutuk hodi halo agresaun-fisiku hasoru-lezadu nain rua hanesan meiu neebe adekuadu hodi resulta lezadu sira hetan kanek, moras no bele hetan difisiensia ba lezadu RRP nia orgun importante, maibe arguidu sira hakarak halo hodi hetan resultadu ida nee.
Para alem de prosesu ida nee, arguidu nain-hitu, sira nia kualidade mos hanesan arguidu iha prosesu seluk ho NUC: 0250/22.PDDIL Julga ona iha Tribunal.
Hahalok arguidu sira nian nee lei bandu no sei hetan kastigu tuir lei penal, maibe arguidu sira hakarak halo nafatin.
Tanba nee konstitui arguidu nain hitu (7) nuudar ko-autor material ba konkursu krime ho forma konsumadu, pratika krime ida, ofensas integridade fizika grave no krime ida ofensas integridade fizika simples, neebe previstu no punidu iha artigu 146º al. a), b), c) no artigu 145º n. 1 husi kodigu Penal.
Audensia julgamentu nee, prezide hosi Juiz kolektiva, José Gonçalvez, Jumiati Freitas, José Quintão, Ministeriu Publiku reprezenta husi Prokurador nain ida, no arguidu hetan asistensia legal husi Defensor Publiku, José Maria Guterres.
(ter)
