DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu JFP neebe deskonfia komete krime ameasa kontra lezadu DRS.
Juiz deklara katak, Krime refere ho nia natureza semi publiku, lei fo dalan atu dada fila kuandu lezadu ba iha prosesu nee aseita. Maibe ba iha prosesu nee lezadu la aseita, tanba nee Tribunal kontinua julgamentu.
Tuir akuzasaun katak, iha loron 27 fulan Abril tinan 2023, por volta 9h:00, arguidu ba iha lezadu nia hela fatin Bairo Pite, Dili hodi husu lezadu, maibe nia feen TC hatan dehan nia laen lori kareta ba sosa modo iha Ermera.
Arguidu husu nafatin ba iha lezadu nia feen hodi hateten nia ba ho se, maibe nia feen hatan dehan hau la hatene, tanba nee arguidu hatan katak “ita mesak makasae hotu, o nia laen iha karik hau hasai tiha nia kakorok”.
Bainhira lezadu fila husi Ermera mai iha nia hela fatin Bairo Pite simu informasaun husi nia feen hodi hateten katak ohin arguidu mai iha uma hodi hateten katak ita mesak makasa’e hotu, o nia laen iha karik ha’u hasai tiha nia kakorok”.
Iha loron hanesan por volta 14h:00 lokraik arguidu mai fali iha lezadu nia uma hodi hateten “hau sei buka tuir o, o seidauk hatene didiak hau, tanba ne lezadu mos hatan dehan hein deit ema sei manda karta ba o no arguidu hatan fila fali hodi dehan depois mak o haree.
Arguidu halo ameasa hasoru lezadu, tanba deskonfia lezadu amante ho arguidu nia feen too ikus mai sira separa.
Konsekuensia husi arguidu nia liafuan atu hasai nia kakorok, halo lezadu tauk no la iha liberdade atu halo sirkulasaun.
Arguidu hatene katak bainhira ho liafuan atu hasai ema nia kakorok, halo ema tauk atu halo movimentu, maibe nia halo nafatin saida mak nia hakarak.
Arguidu halo krime ho livre, deliberada, konsentemente no hatene katak hahalok nee proibidu no hetan pena tuir lei.
Arguidu hanesan autor material ba krime ameasa tuir artigu 157 nº 1 kodigu penal.
Hatan ba akuzasaun nee, iha sala julgamentu arguidu JFP nega faktus neebe Ministeriu Publiku imputa ba nia katak, ameasa atu tesi kotu lezadu DRS nia kakorok.
Arguidu deklara ba Tribunal katak, momentu neeba nia ba duni lezadu DRS nia uma no atu ba husu lezadu, tanba tula nia ferik oan iha tuku 7 kalan too tuku 9 dader no nein ameasa lezadu.
Arguidu deklara katak, momentu neeba nia nervozu duni, tanba lezadu tula nia ferik oan, maibe kona-ba ameasa nee la loos.
Rona tiha arguidu Tribunal husu atu tama kedan ba iha alegasaun. Iha alegasaun Ministeriu Publiku reprezenta husi Prokurador Nelson Magno, husu Tribunal atu absolve arguidu tanba faktus sira la provadu.
Nunee parte Defensor Publiku, José da Silva aseita ho alegasaun Ministriu Publiku nian no husu Tribunal atu absolve arguidu husi krime ameasa.
Hafoin rona tiha Tribunal marka fali ba loron 23 Janeiru hodi rona leitura desizaun ikus.
Audensia julgamentu nee prezide husi Juiz singular, José Quintão, Ministriu Publiku reprezenta husi Prokurador, Nelson Magno, no arguidu hetan asistensia legal husi Defenson Publiku José da Silva.
(ter)
