DILI, STLTIMORLESTE.com – Governu liu husi Ministeriu Interior (MI) ho Komando Jeral Polisia Nasional Timor Leste (PNTL) sei diskute kona-ba kandidatu Komandante Jerál foun periodu 2026-2029.
Nia degan, komesa iha fulan Janeiru nee sei halo diskusaun ho Komando PNTL hodi fihir figura neebe mak atu asumi knaar hanesan Komandante Jeral PNTL no Segundu Komandante Jerál PNTL foun.
“Ami hein hela prosesu, ami prosesa hela, pois mak ita haree took. Hau seidauk iha lista. Maibe komesa agora fulan nee ba oin too iha fulan Marsu ami komesa diskute asuntu nee,” hatete Ministru Interior (MI), Francisco da Costa Guterres ba jornalista sira iha CFP Dili, Segunda (12/01/2026).
Nia tenik, Ministeriu Interior sei prepara tan baze legal balun molok halo diskusaun klean asuntu nee ho Komando Jerál PNTL.
Entretantu tuir dekretu-lei numeru 35/2024 iha loron 18 Outubru kona-ba estatutu Polísia Nasionál Timor Leste iha artigu Artigu 47.º neebe koalia kona-ba Komandante Jeral.
- Komandante Jeral nee nomea no ezonera bazea ba rezolusaun husi Governu sub- proposta husi membru Governu neebe responvél ba area seguransa interna ho mandatu tinan tolu bele renova dala ida deit ba periodu ida tan.
- Nomeasaun ba Komandante Jerál tenke ho deviza Komisáriu Jerál Polísia ou Komisáriu.
- Se mak atu nomea ba kargu Komisariu tenke nia deviza ka postu Komisáriu no Komisariu Asisténte.
Kargu segundu Komandante Jeral PNTL tuir artigu 48 husi sekretu lei númeru 35/2024 iha loron 18 Outubru kona-ba estatutu Polísia Nasionál Timor Leste mak.
- Segundu Komandante Jeral nee nomea no ezonera bazea ba rezolusaun husi Governu sub- proposta husi membru Governu neebe responvél ba area seguransa interna ho mandatu tinan tolu bele renova la ida tan ba periodu ida tan.
- Nomeasaun ba Segundu Komandante Jerál tenke promove postu ba Komisariu.
- Nomeasaun ba Segundu Komandante Jerál PNTL bele mai husi polísia neebe ho postu Superintendente Xefe Polísia.
Observasaun STL rekorda fali katak, Komandante Jerál PNTL Komisáriu Jerál Polísia Henrique da Costa no Segundu Komandante Jerál PNTL Komisáriu Pedro Belo Belo hetan nomeasaun no pose iha ambitu selebrasaun aniversariu PNTL iha 27 Marsu 2023 ba manbatu tinan tolu. Nunee iha Marsu 27 tinan sei termina nian mandatu.
(jen)
