DILI, STLTIMORLESTE.com – Feto barak sei hasoru diskriminasaun oin-oin husi sosiedade, tanba nee Governu liu husi Sekretaria Estadu ba Igualdade (SEI) presiza esforsu makaas halo advokasia no promosaun ba igualdade jeneru.
Akademista husi UNTL, Judite Dias Ximenes ba STL iha nia knaar fatin Kaikoli, Tersa (13/01/2026) hatete, maske iha ona lei neebe garantia ba feto maibe iha sistema patriarkal ida nee sei halo diskriminasaun ba feto, tanba nee Governu liu husi SEI presiza halo sosializasaun makaas kona-ba lei neebe estadu ratifika ona kona-ba direitu feto.
“Maske iha lei maibe ita iha kultura neebe mos dala ruma sei taka dalan ba feto nia involvimentu, tanba nee Governu liu husi SEI presiza halo esforsu makaas liu tan nunee halo advokasia no promosaun ba igualdade jeneru iha Timor Leste,” dehan nia.
Nia mos enkoraja feto iha Timor laran tomak atu esforsu aan nafatin ba oin maske sei iha bareira neebe satan feto, maibe ho feto nia vontade sei bele lao oin.
Feto fiar aan ho matenek neebe iha hatudu ba mane katak feto mos bele, no bele duni atu halao servisu iha nasaun nee.
Nunee mos Prezidente Ezekutivu Rede Feto Timor Leste, Zelia Fernandes hatete, kona-ba feto iha ekonomia no dezempregu ohin loron kona-ba lei trabalhador seidauk aprova iha Parlamentu Nasional, ida nee sai lakunas ida.
“Feto ekonomia no dezempregu ita haree katak too ohin loron lei trabalhador domestika seidauk aprova iha Parlamentu Nasional, entaun ida nee sai hanesan lakunas ida, sai hanesan kestaun ida neebe hanoin katak kongresu reafirma fila fali oinsa atu ezije ba Governante sira hodi toma konsiderasaun aselera aprovasaun ba lei trabalhador domestika, ita haree iha diskriminasaun barak hasoru trabalhador domestika sira, maibe laiha baze ruma oinsa bele haree ida nee,” dehan nia.
Aleinde nee koalia mos kona-ba Kouta 30% ba feto nia reprezentasaun iha politika, maibe iha sorin seluk koalia kona-ba infraestrutura seidauk haree kouta minimu ruma neebe bele atribui ba feto, entaun Rede Feto kria kongresu hodi diskute mos kona-ba kouta 30% ba feto iha infraestrutura ka iha area konstrusaun.
Nunee mos ba iha inkluizaun sosial koalia mos kona-ba veterana sira, tanba verifikasaun barak dadus barak liga ho veteranus barak liu liga ho mane maluk ou aman sira deit, maibe feto sira mos dala barak la hetan atendimentu ida diak iha verifikasaun, tanba perguntas balun neebe la sensivel bainhira halo verifikasaun, entaun kestaun sira nee hotu levanta laos deit iha kongresu nasional maibe husi kedas konferensia munisipal neebe feto sira hasoru direita.
(eme)
