DILI, STLTIMORLESTE.com – Bolsa kandidatu profesores nivel sekundariu no tekniku vokasional neebe foin daudaun koloka ona ba iha Munisípiu Ainaro, balun aluga komunidade nia uma no balun husi Munisipiu refere.
Diretor Edukasaun Munisipiu Ainaro, Patricio da Costa Magno dehan, bolsa kandidatu profesores sira nee balun hela iha komunidade nian uma no balun Ainaro oan rasik.
“Bolsa Kandidatu foin daudaun koloka mai nee hamutuk 21, nee ba ensinu sekundariu no tekniku vokasional, kona-ba sira nian hela fatin, balun aluga uma no balun hela iha komunidade sira nian uma, tanba nee ita nian bolsa kandidatu balun mak aluga uma, no balun Ainaro rai nain kedas,” dehan Patricio ba STL liu husi telefone, Tersa nee (13/01/2026).
Nunee mos Diretor Servisu Edukasaun Munisipiu Manatuto, Patricio da Cruz Quintao dehan, profesores sira nee balun aluga uma no balun mos komunidade sira mak fo fatin ba sira hela. Kandidatu sira nee balun aluga uma no balun komunidade sira mak fo fatin ba sira hela,” nia dehan.
Entretantu Diretor Servisu Edukasaun Munisípiu Bobonaro, Miguel Freitas dehan, kona-ba bolsa kandidatu profesores neebe koloka mai iha Munisipiu Bobonaro, konaba sira nian hela fatin nee presiza husu no iha dadus lo-loos.
“Hau hanoin konaba bolsa kandidatu profesores neebe koloka mai iha Munisipiu Bobonaro, kona-ba sira nian hela fatin nee presiza husu no iha dadus lo-loos, atu nunee ita bele hatene hira mak aluga uma no hira mak hela ho komunidade sira,” tenik nia.
(jac)
Edukasaun Munisípiu Laiha Kompetensia
DILI, STLTIMORLESTE.com – Servisu Edukasaun Munisipiu Ainaro laiha kompetensia atu autoriza bolsa kandidatu profesores neebe husu atu muda fatin hanorin, tanba nee kompetensia husi Ministeriu Edukasaun nasional.
Haktuir Diretor Edukasaun Munisipiu Ainaro, Patricio da Costa Magno ba jornalista STL, Tersa nee (13/01/2026).
“Kona-ba profesores sira husu muda fatin hanorin nee husi ministeriu mak bele muda no ami labele muda, sira husu muda, maibe sira husu ministeriu, foin daudaun nain ida mak moras husu halo karta mai, seidauk iha informasaun husi ministériu, tanba nee sira sei la muda ema arbiru,” nia haktuir.
Iha fatin seluk, Diretor Servisu Edukasaun Munisípiu Likisa, Julio da Silva hatete, ho sirkular neebe husi ME fo sai ona, nee duni sei la muda fatin hanorin, maibe mantein ida nee, nee duni bolsa kandidatu sira nafatin halo knar iha fatin,” nia informa.
(jac)
