BAUKAU, STLTIMORLESTE.com – Ekipa Nasional husi Ministeriu Administrasaun Estatal (MAE) rekolha ona informasaun kona-ba kazu projetu husi Programa Nasional Dezenvolvimentu Suku (PNDS) iha Suku Afasa, Postu Kelikai Antigu, Munisipiu Baukau, tanba deskonfia hamosu korupsaun.
Administrador Postu Kelikai Antigu, Francisco Matias Gusmão “Junior” informa, relasiona konferensia imprensa neebe komunidade sira husi bairo Ina Boba iha Aldeia Uligata, Suku Afasa realiza iha fulan Dezembru 2025 hasoru ekipa implementador projetu PNDS tinan 2023 iha Suku Afasa mak, iha inisiu fulan Janeiru nee ekipa husi MAE too ona Suku Afasa rekoilha informasaun sira bazeia ba komunidade sira nia ejizensia liu husi konferensia imprensa neebe iha.
“Projetu 2023 neebe foin daudauk problema sira halo press nee ekipa husi Ministeriu Administrasaun Estatal lidera husi exselensia DJDL mai tiha rekoilha ona informasaun ba ona leten, desizaun exselensia Ministru nian iha inkeritu ruma ga lae depende ba relatoriu husi exselensia DJDL ba exselensia Ministru foin ita rona loos nia rezultadu,” Dehan Administrador Postu Kelikai Antigu, Francisco Matias Gusmão “Junior” ba STL liu husi telefone, Tersa (13/01/2026).
Administrador Postu Kelikai Antigu nee katak, projetu PNDS neebe implementa iha Suku Afasa, liu liu iha Aldeia Uligata sai problema hodi ekipa MAE tun too terenu rekoilha informasaun nee nuudar programa anterior, tanba hanesan Administrador seidauk simu pose iha momentu neeba, nunee kabe responsabilidade ba lideransa tuan sira.
Maibe atual hanesan Administrador Postu kolabora iha prosesu hodi foti solusaun ba problema sira, tanba orsamentu neebe aloka liu husi PNDS atu fo benefisiu ba komunidade iha area remotas.
“Como ekipa DJDL mai ona ita entrega ba sira ho esperansa katak sira buka tuir ninia defeitu no kauza loloos para ita hetan rezultadu loloos, tanba orsamentu ida nee ita aloka atu benefisia ba povu neeba mak iha area nee, mais vontade no komitmentu servisu ekipa laiha hodi hamosu dezentendimentu ida nee,”
Tuir nota konferensia imprensa neebe STL asesu husi komunidade Bairo Ina Boba katak, orsamentu husi PNDS tinan 2023 neebe Ministeriu Administrasaun Estatal preve ba Suku Afasa hamutuk rihun US$ 28.000.00 atu halo reabilitasaun estrada rural diresaun husi area Loibalari too Budefu ho tipu cor sementi ba medida metru 600. Servisu cor estrada ho sementi hahu kedas iha tinan 2023 no tuir planu servisu iha projetu refere ho durasaun fulan 3 neebe tuir data neebe iha atu termina iha tinan 2023, maibe too ohin loron projetu reabilitasaun refere la finaliza no sementi saku 50 sai fatuk no material seluk tan hetan estragus, tanba projetu refere abandona no deskonfia Xefe EIP PNDS iha Suku Afasa neebe responsabiliza ba projetu refere utiliza orsamentu neebe aloka ba projetu refere ba ninia nesesidade privadu.
Aliende mos konstrusaun Uma Naroman ba Povu (UNP) neebe konstrui iha tinan 2022 hamutuk uma 9 kuaze konklui ona, maibe la kompleta ho mobiliariu hanesan kama no seluk tan, inklui la halo avaliasaun no ofisialmente inagura konstrusaun UNP, maibe parte Autoridade Suku no ekipa PNDS entrega ona UNP ba benefisiariu sira.
Nomos konstrusaun edifisiu eskola ensinu baziku primeiru, segundu no terseiru siklu Eubere, medida naruk metru 23 luan metru 9 ho valor orsamentu rihun US$ 44 neebe progresu fiziku finaliza ona, maibe seidauk kompleta asesoria balu, tanba la keramik tuir dezenhu no BoQ neebe iha, maibe la halo avaliasaun ba projetu refere.
Inklui seluk tan mak ekipa PNDS Suku Afasa deve rental foto kopi husi tinan 2022 too 2024 ho montante orsamentu US$ 400.00 seidauk selu.
(tom)
