BAUKAU, STLTIMORLESTE.com – Mota rua (2) iha Aldeia Uaiharebo’o, Suku Uatulari, Postu Administrativu Vemasi, Munisipiu Baukau, difikulta komunidade sira nia viajen ho transporte iha tempu udan, tanba laiha ponte.
Informasaun nee hatoo husi Xefe Suku Uatulari, Venancio da Costa ba STL iha Vila Nova Baukau, Tersa (13/01/2026).
“Ponte mak laiha, durante nee ami nia problema mak kona-ba estrada Uaiharebo’o tanba ami liu mota 2 udan kuandu tun ona motor labele liu sira hulan deit, preokupasaun ba alin oan estudante sira bainhira udan mota tun Inan Aman kous deit mak liu, se komunidade moras ba hospital hein mota para mak ba mais emerjensia liu ona hulan deit,” nia informa.
Xefe Suku nee hateten, Uaiharebo’o nuudar Aldeia ida neebe pertense ba Suku Uatulari neebe tinan naruk ona komunidade sira infrenta problema iha tempu udan, tanba laiha ponte neebe estabelese iha mota 2 eziste refere hodi fasilita komunidade sira nia movimentasaun.
Nunee iha tempu udan bainhira mota tun komunidade sira neebe ho moras grave atu transporta lalais ba fasilidade saude, tenke ajuda husi komunidade seluk liu husi hulan hakat liu mota 2 refere hafoin tula iha kareta multi funsaun lori ba fasilidade saude. Nomos labarik estudante sira ajuda kous husi Inan Aman hakat liu mota 2 refere hafoin labarik sira ba eskola.
“Mota nee nia luan metru 20 boot tebes difikuldade tebes ba ami durante nee ami nia preokupasaun mak nee deit ami hein planu mos seidauk tama hela deit,” Venancio katak.
Xefe Suku nee komenta, preokupasaun refere Autoridade Suku submete ona proposta ba Ministeriu Obras Publikas no Autoridade Munisipiu Baukau atu konstrui ponte hodi fasilita komunidade sira nia movimentu, maibe too iha loron seidauk iha rezultadu.
Nunee Autoridade Suku planu atu utiliza orsamentu husi Programa Nasional Dezenvolvimentu Suku (PNDS) konstrui ponte hodi fasilita komunidade sira nia movimentu, maibe ponte 2 refere ho medida laun metru 20, neebe konsidera boot liu orsamentu kada tinan husi PNDS, tanba nee hein responde husi Autoridade kompetente.
“Ami labele utiliza osan nee tanba ponte nee boot dalan nee ba dalan nasional, tanba liu husi dalan nee mosu iha Ossouala tama iha Loilubu, entaun durante nee ami lori ona proposta ba maibe seidauk iha resposta,” Venancio informa.
Xefe Suku nee konsidera, estrada ligasaun husi Vemasi Vila nia diresaun liu husi Suku Uatulari nuudar estrada nasional, maibe iha tempu udan difikulta tebes komunidade sira nia movimentu, tanba laiha ponte no kondisaun seluk tan, nunee husu Ministeriu Obras Publikas atu tau atensaun ba asuntu refere.
Liga asuntu nee STL tenta konfirma Koordenador Tekniku Obras Publikas Destakadu Munisipiu Baukau, maibe laiha fatin atu fo komentariu.
(tom)
