DILI, STLTIMORLESTE.com – Atu prevene no redus moras dengue iha rai doben Timor Leste, buat neebe importante bá sidadaun hotu mak tenke iha konsensia husi idak-idak nia aan no sosializasaun makaas husi ekipa Ministeriu Saude nian.
Liafuan nee haktuir husi Estudante Finalista Universidade da Paz ka Sidadaun Amelia Ley Gomes bá STL iha Vila Verde, Tersa (13/01/2026).
Tuir nia, atu hamenus ka redus moras dengue nee, sidadaun ou ema hotu tenke iha konsensia rasik hodi hamos ambiente neebe besik iha uma hun sira hanesan baleta kuak labele husik bee nalihun, roda aat, kalen aat no vazu neebe mak iha uma oin ka iha uma sori-sorin tenke kontrola bebeik i hamos bee sira neebe mak lihun ba.
“Hau hanoin moras dengue nee sei bele hamenus ou halakon, bainhira ema ida-idak badinas no kontrola hamos meiu ambiente iha ita nia sor-sorin. Ita tenke hamos tutuir baleta para bee labele nalihun. Nunee mos roda aat sira, kalen aat no vazu neebe mak iha uma, ita tenke kontrola bebeik i hamos bee sira neebe nalihun, tanba dengue nee moris husi bee, maibe bainhira mos hotu dengue sei laiha,” nia tenik.
Nia sujere, alende nee Ministeriu Saude mos tenke halo sosializasaun makas kona ba dengue ba povu sira iha rai doben ida nee, atu nunee sidadaun hotu bele iha konesementu no komprende diak kona prevensaun moras dengue nee.
Nunee mos Estudante Universidade Dili, husi Fakuldade Edukasaun, Manuel dos Santos Tavares hatete, moras dengue hanesan moras ida neebe hadaet, kauza husi virus dengue ida hodi transmiti husi susuk Aedes Aegypti nia tata. Susuk refere mai husi be nalihun, sasan foer sira hanesan baleta kuak no be neebe tau kleur iha balde no tanke, tanba susuk nee bele halo tolun.
Tuir nia, atu hamenus ka redus susuk refere, ema hotu presiza halo limpeza ka hamos uma hun no fatin sira neebe temi ona, atu nunee susuk refere labele mosu no tolun iha fatin sira nee.
“Hau hanoin atu redus susuk refere hanesan sidadaun ita laos hein deit governu mak servisu no esforsu mesak, maibe presiza ita hotu nia konsensia atu idak-idak hamos nia uma hun, baleta kuat no be nalihun sira. Ita tenke kontrola bee neebe ense iha balde no tanke labele rai kleur, tanba susuk nee bele tolun iha bee neebe nalihun kleur,” dehan nia.
Nia hatutan, husi parte Ministeriu Saúde nian mos tenke nafatin halo sosializasaun bá povu sira iha fat- fatin mais menus semana ida dala ida. Atu nunee povu sira bele iha konesementu kona bá prevensaun moras nee rasik.
Iha sorin seluk Ministeriu Saude liu husi Diresaun Nasional Educasaun no Promosaun Saude (DNEPS), iha dia 10 de Janeiru nee halo avizu ofisial kona-ba prevensaun moras dengue ba komunidade sira iha area Fatuhada, Tasi Tolu no Maslidun.
Avizu ida ne halo hanesan medida prevensaun no alerta ba populasaun atu aumenta atensaun no kuidadu hodi prevene moras dengue, neebe mak sei nafatin sai problema saude publika iha tempu udan.
(dom)
