DILI, STLTIMORLESTE.com – Prezidente Republika (PR), Jose Ramos Horta halo enkontru alargada ho delegasaun Diretus Humanus, hodi deskute kona-ba situasaun neebe akontese iha Mianmar.
Iha loron kuarta (14/01/2026) Prezidente Republika Jose Ramos Horta simu delegasaun direitus umanus husi Mianmar atu diskute justisa no responsabilizasaun rejional
Prezidente Republika, Ramos Horta, simu delegazaun ida husi Organizasaun Direitus Umanus Chin, iha enkontru alargadu ida atu diskute situasaun umanitaria iha Mianmar no promosaun justisa no responsabilizasaun iha nivel rejional.
Durante enkontru nee, delegazaun informa ba Xefe Estadu kona-ba abuzu sistematiku no naran “reinu teror” neebe halao husi junta militar Mianmar kontra populasaun sivíl. Parte rua mos reflete kona-ba istoria hamutuk husi luta ba determinasaun, hodi sublina ligasaun solidariedade neebe klean liu entre Timor Leste no Mianmar iha defeza ba demokrasia, liberdade no dignidade umana.
Diskusaun mos aborda prosedimentu legal sira neebe foin hahu iha Díli kontra membru balu husi forsa armada Mianmar nian, neebe akuzadu ba alegadu krime kontra umanidade.
Prezidente Ramos-Horta no reprezentante husi delegazaun reafirma importansia fundamental husi sistema judisial independente ida, no konkorda katak prosesu lejal sira tenke lao tuir dalan normal, laiha interferensia polítika ruma.
Iha kontestu nee, delegazaun destaka papel organizmu internasional sira, hanesan Mekanizmu Investigativu Independente ba Mianmar (IIMM), neebe fornese prova verifikadu sira atu apoiu sistema judisial timorense, hodi asegura prosesu ida neebe rigorozu, transparente no justu.
Enkontru taka ho delegazaun fo elojiu ba Timor-Leste hanesan lian moral ASEAN nian, hodi destaka tranzisaun susesu husi nasaun nee ba demokrasia hanesan fonte esperansa no inspirasaun ba rejiaun.
Iha okaziaun nee, Prezidente Republika exprime nia agradese ba konfiansa neebe fo ona no reafirma kompromisu metin Timor-Leste nian ba estabilidade rejional, Estadu Direitu no protesaun direitus umanus universal sira.
Iha loron Tersa (13/01) Grupu ida neebe reprezenta vítima sira husi krime atrosidade neebe akontese iha Mayanmar, hatoo keixa kriminal ida ba Ministeriu Publiku Timor Leste no husu atu loke investigasaun.
Keixa kriminal nee halo hasoru Junta Militar Mianmar nian neebe komete krime funu nian no krime hasoru umanidade, kontra ninia Povu rasik.
Grupu neebe hatama keixa kriminal nee reprezenta povu kristaun husi Estadu Chin, neebe lokaliza iha territoriu Mianmar, besik fronteira ho nasaun India.
(eme)
