BAUKAU, STLTIMORLESTE.com – Autoridade Munisipiu Baukau sei implementa projetu hamutuk 29 liu husi Programa Dezenvolvimentu Integradu Munisipal (PDIM) iha tinan 2026.
Informasaun nee hatoo husi Prezidente Autoridade Munisipiu Baukau, Veneranda Lemos ba jornalista sira iha ninia knaar fatin Vila Nova Baukau, Kinta (15/01/2025).
“Tuir aprovasaun neebe ita iha 29 projetus neebe mak haree liu ba infraestrutura nian, maibe ami halo ezersisiu Internamente tanba projetu sira husi Edukasaun no Saude nian nee proto tipu se nia proto tipu ami hetan kortes lubuk ida husi nasional entaun ami tenke haree fila fali sira proto tipu nee tenke mai ho dezenhu no implementasaun hanesan i orsamentu diferente entaun projetus 29 ami tenke halo ezersisiu para bele kobre ba projetu proto tipu husi Ministeriu Saude ho Edukasaun nian,” nia dehan.
Veneranda informa, projetu 29 hetan ona aprovasaun husi Nasional no Autoridade Munisipiu Baukau sei implementa liu husi PDIM, maibe molok implementa Autoridade Munisipiu sei halao ezersisiu ba projetu numeru 29 nunee bele hatene projetu proto tipu husi Ministeriu Saude no Edukasaun, tanba iha tinan 2025 projetu ba edifisiu eskola no saude neebe Autoridade Munisipiu Baukau enkaixa la konsege implementa liu husi PDIM, maibe implementa husi Ministeriu 2 refere.
Nunee projetu 29 sei iha hakat ba faze ezersisiu bainhira konklui ona iha prosesu aprovisionamentu sei anunsiu projetu hira mak atu implementa liu husi PDIM iha Munisipiu Baukau.
“Iha mos edifisiu eskola balu, postu saude, uma ba profisionais saude sira, uma ba profesores sira, bee moos, jardim no iha mos estrada neebe ita atu responde iha Postu balu,” Veneranda akresenta.
Projetu hirak nee seidauk bele indika atu implementa iha fatin neebe, tanba seidauk hakat liu faze aprovisionamentu, maibe sei implementa iha territoriu Munisipiu Baukau, tanba konstrui ho alokasaun orsamentu husi Kapital Dezenvolvimentu neebe preve ba Autoridade Munisipiu Baukau.
Entretantu orsamentu ba Kapital Dezenvolvimentu neebe aloka ba Autoridade Munisipiu Baukau iha tinan 2026 hamutuk US$ 2,310.213.
(tom)
