DILI, STLTIMORLESTE.com – Hahu husi fulan Janeiru too Dezembru tinan 2025, Servisu Nasionál Ambulánsia Emerjénsia no Médikamentu halo evakuasaun ba pasiente hamutuk 16.410, husi numeru nee kompostu husi aero 150, maritima 26 no restu nee terestre hotu deit.
Nia dehan, durante tinan 2025 hahu husi Janeiru too Dezembru, Servisu Nasionál Ambulánsia Emerjénsia no Médikamentu halo evakuasaun ba pasiente hamutuk 16.410, kompostu husi aero 150, maritima 26 no restu husi terestre hotu kedas.
“Total pasiente neebe mak ita evakua husi Janeiru too Dezembru tinan 2025 husi komunidade lori ba sentru saude no fasilidade saude sira neebe besik no ba HNVG no mos hospital rejional inklui RAEOA no Atauro hamutuk 16.410 pasiente, iha aero 150 pasiente, maritima 26, tanba ita nia roo operasaun foin lao fali, maibe maioria ne’e terestre hotu kedas,” hatete Diretor Jeral Servisu Nasional Ambulancia Emergencia Medika (SNAEM, I.P), Simplicio Amaral ba jornalista sira iha nia knaar fatin Kaikoli, Kinta (15/01/2026).
Nia esplika, durante SNAEM.IP halo evakuasaun pasiente nain lima mak lakon vida, kauza husi asidente trafiku neebe mak akontese iha loron boot sira.
“Pasiente mate iha tinan 2025 ita hetan nain lima, balun mos grave ita tula tiha depois mate iha kareta laran, depois ita nia ekipa SNAEM evakua iha munisípiu, ezemplu ho aviaun iha aero ho maritima pasiente sira neebe mak ho kondisaun garve ona,” nia Informa.
Nia tenik, karik liu husi via aero otomatikamente ho aero nee nivel oksijeniu nee tun, entaun fo risku afeita ba pasiente sira neebe mak evakua husi munisípiu mai iha hospitál nasional.
“Kauza husi sira ida mate nee maioria iha asidente trafiku barak, tanba iha festa natal no tinan foun ita nia ekipa sira foin too balun mate ona, balun ba ita hamutuk ho polísia transzitu no polísia transzitu mos iha dadus hotu ba ida nee, hanesan iha Munisípiu Baucau mós mate ida, iha neeba sira evakua ho kondisaun grave mate, balun hanesan hau koalia ona katak ho distansia neebe mak dook fo impaktu ba evakua pasiente antes too iha Hospitál Nasionál Guido Valadares sira bele hakotu iis iha dalan, ita iha mekanizmu oin-oin atu salva sira, maibe dala ruma la too iha neeba,” nia hatutan.
Nia haktuir, tuir dadus neebe mak sira durante halo evakuasaun iha tinan 2025, Servisu Nasionál Ambulánsia Emerjénsia no Médikamentu sira evakua barak liu mak maternidade no asidente trafiku.
“Iha nee bazeia ba dadus ita evakua pasiente neebe mak barak primeiru lugar mak maternidade, segundu lugar mak trauma no asidente trafiku no terseiru lugar nee pasiente sira nee hanesan moras baibain balun atu mai halo ezaminasaun regular no balun diagnóstiku iha hospitál nasionál no hospitál rejionál,” nia koalia.
Tanba tinan 2026 Servisu Nasionál Ambulánsia Emerjénsia no Médikamentu kontinua nafatin koordena no halo enkontru ho autoridade saúde iha Ministeriu Saude nia laran liu-liu ho diretór sira no diretór jerál sira atu bele kontinua presta servisu neebe mak diak, tanba SNAEM sei esforsu halo evakuasaun pasiente husi aero, maritima no terrestre, atu nunee bele lori ita nia komunidade sira besik liu ba fasilidade saude sira iha Timor laran tomak.
(jen)
