DILI, STLTIMORLESTE.com – Ministeriu Publiku (MP) iha alegasaun ba krime tolu, husu Tribunal atu tetu no aplika pena neebe justu ba arguidu nain rua, MS no AP.
Iha alegasaun Ministeriu Publiku, Prokurador Antonio Tavares deklara katak, MP akuza arguidu MS no arguidu AP ho krime tolu, krime Ofensa Integridade Fisika Simples, krime Homesidu ho forma tentada no krime Arma Branka.
Prokurador deklara, depois akontese faktus nee vitima nain rua mate hotu, maibe Prokurador bazeia ba provas dokumental, fotografia no autu aprensaun neebe iha.
Prokurador deklara, faktus hatudu iha ema nain rua kanek, ida kanek iha ulun no ida kanek iha liman no mos kotuk laran. No Kanek iha ulun indisus konaba tuda no kanek iha liman no kotuk laran tanba arma branka.
Prokurador haree katak, iha audensia arguidu MS nega ba faktus, maibe arguidu rekonhese katana neebe polisia foti pertense ba arguidu nian. Arguidu deklara katana nee polisia mak foti no kose arguidu nia raan ba iha katana nee.
Prokurador esplika, sasin Armindo Soares dehan, katana nee testamunha mak hetan iha nia uma oin, kuandu dader hader mai, depois mak sasin foti no entrega ba iha Polisia.
Prokurador deklara, arguidu AP nega total kona-ba faktus neebe iha.
Prokurador deklara tan, iha testamunha Adelino deklara iha inspesaun lokal, iha akontesimentu nia la haree, maibe nia rona liafuan hakilar MS mak halo problema ho sira.
Prokurador konsidera provas seluk mak hanesan, deklarasaun arguidu nian nega, tanba nee husu Tribunal atu tetu, maibe sira nia deklarasaun sai baze maske vitima sira mate ona.
Ikus mai Prokurador konklui katak, arguidu MS iha provas neebe forte, arguidu AP momentu neeba hemu deit tua hamutuk ho nia kolega no la iha ema ida hateten nia halo aktu nee.
Tanba nee Prokurador husu ba Tribunal, ba arguidu MS husu Tribunal atu aplika pena neebe justu ba arguidu AP, husu Tribunal tetu no foti desizaun adekuadu no justu.
Enkuantu Defeza arguidu sira nian konsidera katak faktus neebe konsta iha akuzasaun la provadu, husu Tribunal atu absolve arguidu nain rua.
Rona tiha alegasaun, Tribunal adia tiha ba loron seluk hodi tama ba iha faze desizaun.
Tuir akuzasaun neebe mai husi Miniteriu Publiku katak, iha loron 15/02/2020, maizumenus tuku 17h00, arguidu sira tuda uluk lezadu MG neebe joga hela bola.
Akontesementu tuda lezadu MG membru F-FDTL ho naran Loitiri maka interven hodi hakalma tiha situasaun no haruka lezadu MG no arguidu sira, ida-idak fila ba uma.
Bainhira lezadu MG lao hela ba nia uma, arguidu MS ho AP tuda kona lezadu MG nia ulun neebe rezulta kanek no ran sai.
Ho kondisaun kanek no ran nee, lezadu MG halai ba nia aman AL hodi informa katak, “apa, MS ho nia kolega sira tuda kanek hau nia ulun.
Depois de rona tiha informasaun husi lezadu MG refere, lezadu AL sae ba Lucas nia uma hodi husu ba arguidu MS katak “tamba saida mak tuda hau nia oan MG nia ulun”?
Ho lezadu AL nia pergunta refere, arguidu MS no arguidu AP tuda no duni lezadu AL iha nakukun laran.
Iha minutu balun nia laran, arguidu sira kaer lezadu AL iha fatin naroman, hafoin arguidu MS no AP taa lezadu.
Arguidu MS toa kona lezadu AL nia kotuk laran no arguidu AP taa lezadu AL nia liman sikun parte los.
Arguidu AP taa tan dala ida iha lezadu AL nia kakorok, maibe lezadu tahan ho liman, tanba nee katana kona deit lezadu nia kabas parte karuk deit.
Konsekuensia direta no nesesariu husi arguidu sira nia asaun refere, rezulta lezadu MG sofre kanek iha ulun tamba tuda no lezadu AL sofre kanek iha kotuk laran, liman no kabas tanba taa ho katana husi arguidu sira.
Lezadu MG no AL halo tratamentu mediku iha Ospital Nasional Guido Valadares Dili.
Ho faktu no sirkunstansia sira temi ona ha leten, konstitui arguidu sira nudar autor material ba konkursu krime hanesan tuir mai, arguidu MS ho AP nudar autor material ho forma konsumada ba krime ofensas ba integridade fizika simples ida, tuir artigu 145/1 KP, arguidu MS no arguidu AP nudar ko autor material ho forma tentada ba krime omisidiu ba forma tentada, tuir artigu 138 konjuga ho art 23 no 24 Kodigu Penal.
Arguidu MS no arguidu AP nudar ko autor material ho forma konsumada ba krime arma proibidu tuir art. 2/1 aln b), 2 al. f) konjugadu ho art. 20/1 husi lei no 5/2017, loron 19 fulan Abril.
Hatan ba akuzasaun, arguidu MS nega ba faktus katak akuzasaun neebe tribunal lee sai sala hotu. Arguidu deklaran momentu neeba tuku 5:00 loraik arguidu ba joga bola too tuku 06:00 arguidu fila ba uma hasoru labarik nain tolu ho naran Manuel, Mauki ho Amanu baku malu hela depois arguidu fila liu ba uma too uma arguidu troka hotu lansung ba nia maun nia uma atu koalia asuntu kultura sau batar.
Arguidu deklaran tan, arguidu fila husi nia maun nia uma haree motor para iha uma laiha, tanba nee arguidu husu nia fen katak motor ba tiha neebe nia fen hatan katak motor Polisia sira mai foti tiha.
Arguidu dehan, momentu neeba arguidu la tuda lezadu MG no la kaer nia isin.
Arguidu AP mos deklara katak, momentu neeba arguidu fila husi servisu haree lezado MG ho nia kolega sira hemu tua iha sira nia uma oin, maibe arguidu la hetan MS iha neeba.
Audiensia Julgamentu nee, Prezide husi Juiz koletivu Zulmira Auxiladora, Ivan Surita no Juiz estajiadu nain ida, MP reprezenta husi Prokurador Antonio Tavares da Silva no arguidu sira hetan asistente legal husi Advogadu Privadu Jil.
(ter)
