DILI, STLTIMORLESTE.com – Eskola Pre-Eskola Boa Esperansa husu ba inan aman sira atu lori oan sira bá eskola, tanba susesu ba oan sira nian, inan aman tenke hahu husi agora.
Tuir Koordenador Eskola Pre-Eskolar Boa Esperansa YMCA, Antonio B.S. DA Silva dehan, inan aman sira tenke lori oan sira bá eskola, tanba susesu ba oan sira nian, inan aman tenke hahu husi agora. Tanba bainhira lansuporta husi Inan aman, oan Sira mosnsei la aprende buat ruma. Tanba nee husu bá inan aman sira kontinua lori oan sira bá eskola nafatin, liu husi maneira lori oan sira ba rejistu iha eskola sira neebe oan sira bele eskola bá.
“Ita haree eskola balun dok, ultra pasa estrada nee risku boot, neebe inan aman tenke fuan boot hodi oinsa bele lori oan sira too eskola hodi aprende. Kuandu husik deit nee susar, tanba iha sidade nee hasoru transporte barak, halo sira tauk atu bá eskola, tanba nee inan aman tenke akompanha,” dehan nia bá STL iha nia servisu fatin Terra Santa, Tasi-Tolu, Kinta (15/01/2026).
Nia afirma, nudar manorin nain iha eskola sempre informa liu husi media facebook no brosur sira hodi hatoo informasaun bá inan aman, liu-liu sira neebe besik iha eskola lori oan sira mai eskola, maibe desizaun atu lori mai escola depende ba inan aman. Husi parte escola koalia bá publiku katak, hanesan inan aman tenke tulun oan sira, tanba futuru nasaun ida nee iha labarik sira nia liman.
Koordenador Eskola nee hatete, eskola nee rasik hahu ona nia atividade tuir manual no orientasaun husi Ministeriu Edukasaun (ME), liu husi Facebook no WA grup fahe ona informasaun kona bá bainhira atu hahu aula nee. Tanba nee eskola baibain dia 6 de Janeiru tama fali no atividade eskola hahu iha dia 12 nee. Estudante iha eskola nee hamutuk 56, mane 27 no feto 29.
“Ami sei loke odamatan bá inan aman sira neebe hakarak atu mai rejistu ami sei simu. Oportunidade ita fo nee bá inan aman sira lori oan sira mai, ami sei halao fali nomos sei hatoo relatóriu bá ME,” dehan nia.
Nia hatutan, Professor neebe hanorin iha nee hamutuk nain 5 inklui nia rasik, feto 4 no mane 1. Professor sira nee voluntariu hotu, tanba eskola selu sira hanesan voluntariu ho maneira fo osan oituan hanesan transporte nian deit, laos fo tuir oras servisu nian.
Nia haktuir, eskola ida nee privadu no asosiasaun mak halo rekrutamentu bá professor voluntariu, liu husi maneira fo osan oituan bá professor sira hanesan osan transporte. Iha nee laiha profesor husi governu ka permanente, profesor sira nee asosiasaun mak rekruta.
Profesora nain 4 nee, lisensiatura edukasaun nain 2, nian 1 sei finalista, 1 seluk lisensiatura ekonomi no Koordenador rasik lisensiatura sosiais. Sira neebe relasaun servisu edukasaun nian iha nain 3.
Nia katak, kona bá Professor voluntariu nee eskola sempre hatoo bá Ministeriu Edukasaun liu husi relatóriu neebe sempre hatoo iha fulan tolu-tolu Kona bá situasaun estudante no professor. Liu husi maneira relatóriu nee hatoo bá governu katak, sekarik iha oportunidade governu bele aloka professor sira hodi ajuda eskola nee. Maibe too agora eskola seidauk hetan resposta ruma husi governu. Eskola tane liman maibe depende mos bá oportunidade. Maske seidauk hetan resposta maibe hanesan eskola formal sempre hatoo relatóriu eskola nian bá edukasaun.
Estudante sira nee laos mai deit husi Terra Santa maibe mai mos husi fatin seluk hanesan Tibar nain 2, aldeia 4 Setembru, Danau nian, 12 de Outobru, Manleuana no seluk husi Terra Santa.
Nia hatutan, maske eskola nee privadu maibe manual neebe uza Lao tuir ME nomos planu hanorin lao loron- loron nian hetan husi ME. Tema eskola bá tinan ida tomak iha 7 dependa bá durasaun de tema. Baibain fulan 1 ka 3 tema ida mak implementa iha nee. Bainhira tema sira nee remata ona mak halo evaluasaun. Tema 7 neemak hanesan transporte, hau, selebrasaun jeral, kultura, hau no hau nian komunidade, hau ho hau nia rai, hau nia kultura no selebrasaun selebrasaun jeral.
Tema sira nee eskola iha livru rasik ho nia istoria. Neebe kada tema sira nee iha nia livru istoria rasik hodi lee bá sira no knta historia kada tema nian bá sira. Ezemplu tema transporte iha nia livru rasik hanesan transporte iha rai leten, iha tasi laran no iha lalehan, nee konta fali bá labarik sira, nunee mos ho tema sira seluk.
Entertantu Eseskola nee rasik iha Outobru 2017 hetan aprovasaun husi Ministeriu Edukasaun liu husi proposta neebe eskola hatama bá iha ME Munísipiu nomos parte Diresaun Ensinu Bazika iha nasional nian. Nunee iha Dezembru 2017 hahu loke rejistu bá estudante sira no iha Janeiru 2018 hahu ano letivu ate agora.
(dom)
