DILI, STLTIMORLESTE.com – Prezidente Republika (PR), Jose Ramos Horta lamenta ho mandadu husi Tribunal hodi haruka Polisia Nasional Timor Leste (PNTL) detein Reitor Universidade Nasional Timor Lorosae (UNTL) ho Visi Reitor nomos Xefia nain haat seluk ho alzema.
Prezidente Republika Jose Ramos Horta hatoo kestaun nee ba jornalista sira iha Aeroportu Internasional Nicolau Lobato, Bairo Pite, Sesta nee (16/01/2026) hatete, rai ida nee tenke hatudu respeita ba ema nia dignidade, no Prezidente lamenta ho desizaun husi Tribunal neebe haruka PNTL tau alzema ba Reitor ho Kargu Xefia sira nia liman.
Prezidente Republika hatete, se tau alzema bainhira ema nee komete kazu omisidiu ruma, maibe sira sei inosente hela maibe tau ona alzema, se tau alzema kuandu ema nee aprezenta ameasa boot, agora reitor ho Xefia sira nee ameasa boot saida no halai ba neebe.
“Boatomak sira nee la hatene liu lei, la hatene liu prinsipiu, hau hatete beibeik ona,” dehan PR Horta.
Xefe Estadu hatete, liga ho kazu PNTL detein reitor ho xefia sira uza alzema, ida nee laos lamenta deit, maibe kondena makaas, tanba nee Prezidente sei koalia iha Konselhu Superior Defeza no Seguransa.
“Laos la menta deit maibe hau kondena, labele halo knuuk nee, hau hatete dala hira ona ba Komando Jeral PNTL, hau hatete no aviza dala hira ona, KAK imi labele ba kaer ema arbiru, hakarak halo investigasaun bolu ema ba kuartel ba neebe tenke ba, laos halo embuskada ba nia iha karimbala bainhira fila husi NTT tau alzema,” katak Prezidente Republika.
Prezidente Republika hatete, ho desizaun husi Tribunal haruka PNTL halo buska no tau alzema ba Reitor UNTL ho kargu Xefia sira nia liman, ida nee Prezidente kontra asaun nee.
“Nee totalmenta hau kontra, kuandu ema ida kriminozu boot komete omisidiu ou oho ema nee tenke kaer duni, maibe reitor universidade ou kualker ema seluk ida ke la aprezenta ameasa ba tau kedas alzema nee hau totalmente kontra, hau sei foti kestaun nee dala ida tan iha Konselhu Superior Defeza no Seguransa, hau sei koalia ho Prezidente Parlamentu koalia tiha ona ho maun boot Xanana,” dehan PR Horta.
Prezidente Republika hatete, nia rasik koalia ona ho Primeiru Ministru no assuntu nee Primeiru Ministru rasik mak aprezenta assuntu nee.
(eme)
