BAUKAU, STLTIMORLESTE.com – Autoridade Suku Bukoli, Postu Administrativu Baukau Vila, Munisipiu Baukau, entrega rai ba Ministeriu Edukasaun atu konstrui edifisiu Pre-Eskolar.
Xefe Suku Bukoli, Terezinha de Jesus dos Reis esplika, tuir orientasaun husi Ministeriu Edukasaun katak iha territoriu nasional tenke estabese pre-eskolar no Suku Bukoli antes nee iha ona prosesu aprendizajem ba estudante pre-eskolar sira neebe realiza ona durante tinan 2, maibe laiha edifisiu, tanba nee atribui rai ba Ministeriu Edukasaun atu konstrui edifisiu propriu ba labarik estudante pre-eskolar sira atu uzu ba prosesu aprendizajen ho diak.
“Ami iha Bukoli labarik barak abandona laiha fatin atu hanorin labarik pre-eskolar entaun Konselhu Suku iha terrenu oituan hau entrega tiha ona ba Ministeriu Edukasaun atu konstrui pre-eskolar nian,” hateten Terezinha ba jornalista sira iha Bukoli, Sesta (16/01/2026).
Nia informa, rai neebe Konselhu Suku Bukoli entrega ba Ministeriu Edukasaun ho medida 50 metrus kuadradu neebe bele utiliza ba konstrusaun edifisiu pre-eskolar iha Bukoli.
Autoridade Suku Bukoli nee espresa sentimentu, bainhira konstrusaun edifisiu pre-eskolar Bukoli hahu no konklui sei ajuda liu tan komunidade pre-eskolar.
“Nee hanesan naroman foun ida ba ita hotu laos ba deit Suku Bukoli maibe ba Baukau oan hotu para lori oan sira mai eskola iha nee hahu husi idade kiik,” Terezinha komenta.
Iha fatin hanesan, Ministra Edukasaun, Dulce de Jesus Soares agradese ba Autoridade Suku Bukoli, tanba atribui ona rai no sertifikadu rai ba Ministeriu Edukasaun atu fasilita konstrusaun edifisiu pre-eskolar iha Bukoli.
“Agrasede tebe tebes ohin nain Xefe Suku Bukoli rasik entrega rai medida 50 metrus kuadradu atu bele harii pre-eskolar, ita fiar tinan 2026 bele kompleta edifisiu pre-eskolar ida,” Dulce espresa.
Ministra nee argumenta, asaun atribui rai nuudar jestu ezemplu ba komunidade sira iha territoriu nasional atu banati tuir nunee bele kompleta edifisiu sira neebe sei menus. Tanba nee husu komunidade Bukoli atu kontribui prosesu konstrusaun ba edifisiu pre-eskolar Bukoli bainhira hahu.
(tom)
