DILI, STLTIMORLESTE.com – Bankada FRETILIN iha Parlamentu Nasional kestiona konsolidasaun Partidu Kongresu Nasional Rekunstrusaun Timor (CNRT) iha Maliana Vila, tanba viola lei numeru 7/2006 kona-ba kampanha ba eleisaun parlamentar.
Kestaun nee Deputadu Bankada FRETILIN, José da Cruz levanta liu husi plenaria Parlamentu Nasional, Segunda (19/01/2026).
“Iha fim semana nee, ami haree partidu balun hahu halo uluk kompanha, hau haree ida nee keta dekretu lei numeru 7/2006 ba eleisaun kampanha nee keta muda ona karik,” preokupa Deputadu José da Cruz.
Deputadu nee husu ba kuadru Partidu CNRT sira iha Munisipiu Maliana Vila atu haree didiak regras neebe utiliza ba halo konsolidasaun.
Tanba iha konsolidasaun Partidu CNRT nee kria konvoi iha Maliana Vila laran no perturba publiku, no momentu neeba marka prezensa iha neeba laos ema kiik maibe ema bot hotu.
Tan nee husu mos ba Estrutura Partidu CNRT Munisipiu Maliana, tuir lo-loos monitoriza no organiza atividade konsolidasaun laos ba halo fila fali kampanha konvoi.
“Ita boot sira iha problema no reseu hela ba eleisaun 2028 karik, tanba situasaun ida nee perturba publiku, se konsolidasaun nee ba konsolida, laos uza fali truk boot tula saun sistem hodi halo konvoi haleu sidade Maliana Vila,” dehan nia.
Nia reforsa, atividade konsolidasaun nee viola ona lei, tanba tuir dekretu lei númeru 7/2006 nee hatete loron ba kampanha nee loron tolu nulu antes loron rua ba votasaun, tanba saida mak kampanha hahu uluk ona.
Nia dehan, Partidu CNRT viola lei kona-ba kampanha eleitoral, tanba CNE ladun halo servisu diak, liu-liu halo monitorizasaun ba atividade partidu polítiku neebe akontese iha munisipiu.
“Bolu Presidente Komisaun Nasaional Eleisaun atu komunika ho ninia Diretor delegasaun sira iha munisipiu, tanba atividade konsolidasaun laos ba halo konvoi no kampanha, nee ema dehan ita hahu uluk halo kampanha ba eleisaun,” adianta nia.
Iha fatin hanesan, Xefe Bankada Partidu Kongresu Nasional Rekunstrusaun Timor (CNRT), Deputadu Patrocino Fernandes rezeita akuzasaun husi Deputadu Bankada FRETILIN, José da Cruz katak, Partidu CNRT hahu halo kampanha eleitoral iha Munisipiu Maliana Vila.
“Horiseik Partidu CNRT la halo antisipada kampanha maibe halo konsolidasaun mais ita hatene katak konsolidasaun nee konsentra iha fatin ida. Militante sai husi sira nia uma ba fatin konsentrasaun mak sira espresa sira nia entuziasmu no la perturba atividade ruma,” hatan Deputadu Patrocino Fernandes.
Nia dehan, Deputadu Bankada FRETILIN kestiona maneira konsolidasaun Partidu CNRT iha Maliana Vila tanba mosu afiliasaun husi Partidu FRETILIN ba Partidu CNRT.
“Neebe hau hanoin, mas diak preokupasaun nee bele hatudu ba hau katak buat ruma ita senti katak atrapalhadu oituan ho atividade konsolidasaun Partidu CNRT nian,” dehan nia
Nia fo ezemplu, atividade konsolidasaun iha Maliana laos viola lei kona-ba kampanha eleitoral nian, no viola lei nee so utiliza atributu partidu nian ba halo fiskalizasaun ba edifisiu publiku sira.
“Se ita hatais kaos partidu nia ba vizita edifisiu publiku sira, ahh ida nee mak hau hanoin katak nee hanesan buat ruma neebe tuir lo-loos ita tau iha kestaun mais ida atividade konsolidasaun nee konsentra deputadu hotu-hotu neebe parlamentu mos fo osan kona-ba kontaktu eleitorais nian laiha problema kona-ba ida nee,” dehan nia.
(alb)
