DILI, STLTIMORLESTE.com – Deputadu Bankada Partidu Kongresu Nasional Rekunstrusaun Timor (CNRT) konsidera estrada husi Asalaitula too Ossu Vila, Munisipiu Vikeke hanesan ona ho mota laran, tanba governu seidauk reabilita estrada refere.
Kestaun nee Deputadu Bankada Partidu CNRT, Mateus da Cruz de Carvalho levanta liu husi plenaria Parlamentu Nasional, Segunda ( 19/01/2026).
“Estrada Asalaitula husi Ponte ba too Ossu, kuaze kada semana nee deputadu sira foti hela deit, maibe foin lalais nee udan boot akontese iha teritoriu laran liu-liu iha Munisipiu Vikeke, estrada nee sai ona bee dalan laos ona estrada,” preokupa Deputadu Mateus da Cruz de Carvalho.
Nia dehan, se governu seidauk iha hanoin atu reabilita estrada Asalaitula too Ossu pelumenus halo normalizasaun nunee bele fasilita populasaun sira kada loron utiliza estrada nee.
“Se laos tau alkatraun pelumenus ateru tiha nunee transporte publiku bele utiliza, tanba estrada iha fatin nee grave tebes-tebes, ita husi Ponte Asalaitula ba Ossu Vila nee bele lori minutu 40, kareta kiik labele asesu tanba grave demais,” dehan nia.
Nia mos hatutan, durante ne deputadu sira foti beibeik maibe seidauk iha solusaun ba estrada nee, tan nee husu ba Ministru Obras Publika atu reabilita estrada nee.
Iha fatin hanesan, Deputadu Bankada Partidu FRETILIN, Dario Madeira mos husu governu liu-liu Ministeriu Obras Publika (MOP) atu reabilita lalais estrada Asalaitula too Ossu Vila, tanba kondisaun estrada nee grave los.
“Ami husu ami nia mota Asalaitula ba too Ossu Vila nee bele halo lalais i hau la konkorda ho Vise Ministru uluk hatan mai hau katak sei halo estudu viabilidade nee laos sertu para bele konvense komunidade,” dehan nia.
Nia dehan, estrada diresaun Asalaitula too Ossu Vila nee uluk lansa ona iha VIII Governu Konstitusional jilid primeiru.
Horbainhira lansamentu prosesu aprovizionamentu hotu tiha ona maibe derpenti deit adia tia fali nee hamosu tiha duvida.
(alb)
