DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguida inisial HSJ hanesan sidadaun Xinez, neebe falsifika dokumentus kona-ba vistu.
Tuir akuzasaun katak, arguida HSJ nuudar nain ba empreza YI PIN JIA 08 AGENCIA UNIP. LDA. ho nia diresaun iha Hudi Laran Aldeia Teki-Teki, Suku Bairo Pite, Postu Administrativu Dom Aleixo, Munisipiu Dili.
Haktuir dokumentu aprezentadu, empreza YI PIN JIA 08 AGENCIA UNIP. LDA harii iha loron 10 Maiu 2019, ho nia objetivu atu trata dokumentu ka vistu ba trabalhador sidadaun Xinez sira neebe mak tama mai servisu iha Timor Leste.
Halo analiza mos ba dokumentu sertifikadu rejistu kriminal hatudu katak, arguda falsifika ho maneira altera loron emisaun hodi indika loron, fulan no tinan ho maneira koa sai tiha letra sira antes nee hakerek ona hanesan loron 13 fulan Junhu tinan 2022 hodi substitui fali ho data seluk husi orijinalidade iha dokumentu refere.
Identifika mos katak, arguida mos falsifika dokumentu sira husi loja kompanhia Maubisse Unip.Lda. no karimbu Inspesaun jeral Trabalhu nian (IIT), autorizasaun vistu trabalhu hodi altera identifikasaun LY ba fali CW hodi justifika ba Diresaun Assuntu Konselu Ministerio Negosio Estranieiru no Kooperasaun hanesan pareser favoravel ba vistu fixasaun rezidensia nian.
Aleinde ida nee, deteta mos katak liu husi arguida nia kompanhia YI PIN JIA 08 AGENCIA UNIP. LDA, arguida konsege produz falsifika karimbu ho total hamutuk 107.
Tuir faktu neebe indika iha autus konfirma katak, arguida sempre falsifika dokumentu sira deskrita iha leten ho propriu arguida nia ekipamentu ho forma repetidu.
Arguida aproveita situasaun nee hodi inventa, produz no emite dokumentu Estadu nian hodi bosok no fasilita sidadaun Xineza sira hodi hetan vistu trabalhu no vistu fixasaun rezedensia ba sidadun Xineza sira nee, hodi halao atividade negosiu no permanense iha Timor Leste. Arguidu hatene katak ho enganu ou bosok nee, halo Estadu sofre prejuizu neebe signifikativu tebes.
Hatan ba akuzasaun neebe iha, arguida deklara katak, faktus neebe iha loos no arguida konfesa ba faktus neebe iha.
Arguida deklara, halo aktu ida nee tanba la hatene aktu nee kontra lei, ho ansi lakohi lakon nia kliente no labele hetan multa husi Estadu mak arguida pratika aktu nee.
Arguida deklara, nia halo duni rejistu kriminal falsu, karimbu falsu, atestadu mediku falsu, asinatura nia asina deit nia halo ida nee tanba nia kliente sira dokumentus mai tempu badak los ona, halo hanesan nee atu labele hetan multa.
Arguida esplika tan, kliente sira neebe arguida falsifika sira nia dokumentus nee arguida la lembra ona, maibe maizumenus aplikante barak oituan no servisu falsifikasaun arguida la lembra ona hahu husi loron no fulan saida, maibe ikus liu mak iha fulan Julhu bainhira imigrasaun ba kaer arguida.
Arguida rekonhese sasan sira hanesan makina neebe utiliza hodi falsifika dokumentus sira, arguida nian hotu, kona-ba maneira falsifika arguida deklara katak foti tiha dokumentus orijinal sken tiha mak edit no halo komparasaun kliente sira neebe trata legal barak liu no ida neebe ilegal menus.
Arguida rekonhese nia hahalok nee la diak, arguida promete sei la halo tan aktu nee iha futuru no oras nee daudaun arguida nia empreza nee taka tiha ona no husi Governu seidauk aplika multa ruma.
Rona tiha arguida, iha faze alegasaun Prokurador Aderito Tilman husu Tribunal tetu atu aplika pena ba arguida tuir modura husi krime nee.
Enkuantu husi parte defeza Juvinal Dias husu Tribunal tetu atu aplika pena suspensaun ba iha arguida.
Rona tiha alegasaun, Tribunal adia ba loron 1 fulan Fevereru, oras tuku 11 hodi rona desizaun.
Audensia julgamentu nee prezide husi Juiz Kolektivu Jose Escurial, Fransisca Cabral, Juiz Estajiadu nain ida, Ministeriu Publiku reprezenta husi Prokurador Aderito Tilman, arguidu sira hetan asistensia legal husi Defensor Publiku Juvinal Dias.
(ter)
