DILI, STLTIMORLESTE.com – Relasiona ho atuasaun Polisia Nasional Timor Leste (PNTL) nian ba iha dirijente Universidade Nasional Timor Lorosae (UNTL), jurista konsidera katak atuasaun nee tuir norma prosesual, maibe la nesesariu utiliza Azelma.
“Tuir hau nia hanoin atuasaun PNTL ba eis Reitor UNTL no nia maluk sira seluk nee hatudu katak, sira halo knaar ho imparsial tuir duni artigu 217 husi normal prosesual, tanba detensaun nia finalidade atu asegura detidu ba julgamentu tuir prosesu sumariu ka ba Juiz hodi halo primeiru interrogatoriu judisial, iha oras 72 nia laran, ida nee mak PNTL asegura tiha ona,” dehan Jurista Sergio Dias Quintas ba STL iha Kaikoli, Segunda (17/01/2026).
Tuir Sergio, ita hotu hakarak iha Timor Leste ema hotu-hotu iha lei nia oin hanesan, maibe ba kazu ida nee devia reitor ho nia maluk sira seluk la presiza ka la nesesariu tau azelma.
“Dirijente UNTL sira nia personalidade sei garante katak, sira sei la halai ka kontra autoridade seguransa, ida nee mak Prezidente Republika no PM lamenta nee,” dehan nia.
Jurista konsidera, los duni katak azelma nee la presiza no la nesesariu ba kazu ida nee, karik arguidu sira hahalok nee agresivu ka ameasa ba autoridade seguransa nee buat seluk, bele utiliza alzema.
Aktual Defensor nee sujere, karik ba oin arguidu sira neebe PNTL atu kaer se bele haree lai sira nia kondisaun fizika no psikika karik sira moras, sira nia komportamentu pasifiku, kooperativu, kondisaun sira hanesan nee la devia utiliza alzema no alzema utiliza kuandu arguidu nia kondisaun psikika la normal ka arguidu halo ameasa ba autoridade seguransa ka iha posibilidade bele halai ka durante nee arguidu perseguidu ho kondisaun sira nee mak nesesariu para azelma bele utiliza.
Iha fatin ketak, Akademiku Sebastião Dos Santos dehan, atuasaun sira hanesan nee presiza iha koordenasaun atu labele hamosu duvidas.
“Hau hanoin presiza iha koordenasaun ba malu atu labele hamosu duvidas,” dehan nia.
Nia hatutan, importante liu mak prosesu detensaun sira tenke lao tuir regra neebe iha.
(ter)
