DILI, STLTIMORLESTE.com – Tribunal Judisial Primeira Instansia Dili (TJPID) liu husi leitura akordaun, deside kondena arguidu nain 6 ba iha krime omisidiu agravadu.
Iha leitura akordaun nee Juiz prosesu Zulmira Auxiliadora deklara katak, faktus neebe konsta iha akuzasaun provadu hotu.
Tribunal deklara, iha sala julgamentu laran arguidu nain lima MX, BdRG, LVS, MAS no HdJF hili direitu nonok, no arguidu CdCSG mak hili direitu koalia, maibe nega ba faktus neebe iha.
Tribunal deklara, Ministeriu Publiku mai ho krime omisidiu Simples, maibe ikus mai alterasaun Kualifikasaun Juridiku ba iha krime omisidiu agravadu alinha B.
Juiza deklara, maske arguidu nain lima hili direitu nonok no arguidu nain ida hili direitu koalia maibe nega ba faktus, nunee Tribunal bazeia ba deklarasaun husi sasin sira liu-liu ba sasin prinsipal neebe momentu neeba matebian tula, Tribunal la iha duvidas, konsidera katak faktus neebe konsta iha akuzasaun provadu hotu.
Ikus mai koletivu deside hodi kondena pena prizaun tinan 17 ba arguidu CdCSG no arguidu nain lima MX, BdRG, LVS, MAS no HdJF Tribunal deside kondena prizaun tinan 15.
Tribunal mos deklara, arguidu sira atu selu indemnizasaun sivil rihun US$ 6.
Hafoin lee tiha desizaun, Juiz prosesu mos halo kedan alterasaun ba medida neebe iha, antes nee arguidu sira matein hela ho medida Termu Indentidade Rezidensia (TIR) hafoin desizaun Tribunal altera kedan ba Medida Prizaun Preventiva. Nunee autoridade Seguransa lori kedan arguidu nain 6 ba iha Prizaun Preventiva, hodi hein desizaun ikus husi TR.
Antes nee iha alegasaun Prokurador ba prosesu Renato Bere Nahac deklara katak, maske arguidu nain 5 hili direitu silensiu, no arguidu nain 1 nega ba faktus, maibe bazeia ba deklarasaun husi sasin sira, inklui mos CCTV neebe iha, MP la iha duvidas.
Tanba nee MP konsidera katak, arguidu nain 6 komete duni krime neebe MP akuza, tanba nee MP solisita ba iha Tribunal Koletivu atu kondena arguidu nain 6 MX, BdRG, CdCSG, LVS, MAS no HdJF ho pena prizaun tinan 15.
Enkuantu defeza husi arguidu sira nian, Advogadu Privadu Pedro Aparicio deklara katak, arguidu sira la envolve, tanba nee defeza husu Tribunal atu absolve arguidu nain 6.
Tuir faktus katak, iha loron 28 fulan Fevereiru tinan 2024, maizumenus tuku 04:00 dader, vitima Armandino Lemos Soares, akompaña husi nia kolega, oras nee sasin Becior Len Mendes da Silva, ho motor lao ba diresaun Bekora ho nasi kuning iha liman.
Antes sai, lezadu dehan ba sasin atu ba Dolok-Oan hodi naok bibi ida, maibe too iha neeba, iha Metiaut, sira konsege naok tiha bibi ida.
Sira fila husi Metiaut no liu husi rotunda ida, iha Taibesi hasoru kolega nain rua ho naran Kevin no Dito no lezadu husu ba sira atu akompanha sira ba iha Bekora Klak-Fuik. Nunee, sira ho motor-rua, liu husi Semiteriu Bekusi.
Kuandu too iha semiteriu nia oin, sira rona sinal husi arguidu sira “basa liman no hakilar iha momentu neeba arguidu MX hamrik hela iha estrada ninin, foti fatuk tuda ba lezadu nia oin hodi motor baku fila ba rai, arguidu hakilar ba BdRG, CdCSG, LVS MAS no HdJF hamriik hela iha estrada publiku tuda fatuk ba lezadu no sasin sira.
Hafoin arguidu CdCSG tuda tan fatuk ba lezadu kona iha nia ulun, halo lezadu monu ba rai no halo kanek todan no raan sai, hanesan hatudu iha fotografia sira iha arkivu 93 too 103.
Nuudar rezultadu husi atake sira nee, vitma Amardino Lemos Soares sofre ulun fatuk nakfera no raan sai makaas no ikus mai vitima lakon vida.
Ho nunee, arguidu nain neen hanesan MX, BdRG , CdCSG, LVS MAS no HdJF hanesan ko-autor ba materia ho forma konsumada ho krime Omisidiu Simples neebe prevista iha artigu 30 no 138 Kodigu Penal Timor Leste.
Audensia julgamentu nee prezide husi Juiz Koletivu, Ivan Patrocenio, Zulmira Auxiladora, Arjentino Nunes, Ministeriu Publiku reprezenta husi Prokurador Renato Bere Nahac, arguidu sira hetan asistensia legal husi Defensior Publiku Pedro Aparicio.
(ter)
