BAUKAU, STLTIMORLESTE.com – Projetu konstrusaun ponte iha mota Samalari, Postu Administrativu Baguia, Munisipiu Baukau, atinji ona 27%.
Residente Engineer Diresaun Nasional Konstrusaun Vias Rodoviariu, Abílio da Silva Belo hateten, projetu konstrusaun ponte Samalari responsabiliza kompanhia internasional MCC20 husi nasaun Xina neebe Governu liu husi Ministeriu Obras Publikas kontratu ho valor orsamentu millaun 4 resin ba konstrusaun ponte ho distansia naruk metru 108 no luan metru 7.
Projetu refere tuir kontratu neebe selebra ho parte kompanhia, hahu servisu iha loron 15 Outubru 2024 ho durasaun servisu tinan 1 neebe tuir kontratu atu finaliza iha loron 15 Outubru 2025, maibe la konsege, tanba iha failhansu tenkinu husi Governu tarde fo indemnizasaun ba komunidade afetadu.
“Kompanhia MCC asina kontratu ho estadu iha 2024, maibe iha failhansu tarde ganti rugi ba komunidade nia ai-horis sira iha momentu neeba, ho ida nee ami komesa servisu iha Maiu nia laran,” hateten Abílio da Silva Belo ba jornalista sira iha Baukau, Kinta (22/01/2026)
Nia sublina, husi failhansu tenkinu ba komunidade afetadu sira Governu liu husi Ministeriu Obras Publikas solusiona ona, nunee iha fulan Marsu tinan 2025, Ministru Obras Publikas hamutuk ho Prezidente Autoridade Munisipiu Baukau lansa fatuk dahuluk ba projetu refere hodi kompanhia mos hahu kedas servisu iha terenu.
Nia fundamenta, husi servisu sira neebe parte kompanhia halo iha konstrusaun ponte Samalari husi fulan Maiu 2025 too inisiu tinan 2026 fulan Janeiru nee progresu fiziku atinji ona 27.50%.
“Persentajen servisu sae ona ba 27.50% servisu ona ba iha borpain nian hela ida deit ona, tanba borpain iha 45, maibe hela ida mak seidauk sei cor hela planu ami nian aban sei cor,” Abílio da Silva Belo katak.
Residente Engineer akresenta, progresu fiziku ba projetu konstrusaun ponte refere atinji ona 27.50%, tanba parte kompanhia besik konklui ona servisu dahuluk hanesan cor fatin fondasi (borpain) no tuir planu sei kontinua kompleta servisu sira hanesan konstrui fondasi 2 ba ponte refere (abutmen A, B) hafoin hakat ba faze estabelese rin ponte (pier).
Nia garantia, projetu konstrusaun ponte refere tarde liu sei konklui iha fulan Dezembru tinan nee, maibe depende material ba konstrusaun ponte refere husi nasaun Xina mai Timor-Leste, tanba besi baza ba ponte refere sei produz hela iha Xina.
Entretantu tuir dezenhu ba konstrusaun ponte refere bainhira finaliza sei instala lampu ilumina hamutuk unidade 4 iha ponte nia sorin sorin.
(tom)
