DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba krime ofensa ba integridade fizika simples ho forma violensia domestika neebe mak komete husi arguidu JdCMdJ, hasoru lezada MLP nuudar nia feen.
Tuir akuzasaun katak, iha loron 07 fulan Outubru tinan 2024, haleu oras tuku 22:00 OTL, iha Suku Motael Dili, arguidu JdCMdJ nervozu lori liman tuku ho makas dala ida kona iha ofendida nia ulun fatuk, lori liman basa ho makas dala ida kona iha ofendida nia hasan sorin los.
Konsekuensia direta hosi arguidu nia hahalok, ofendida hetan moras makaas iha ulun fatuk, moras iha hasan sorin los, maibe ofendida la ba halo tratamentu iha Hospital.
Kauza husi problema nee, tanba arguidu fila husi serbisu iha kalan boot, ho ida nee mak sira deskuti malu hodi mosu problema.
Arguidu JdCMdJ halo ho forma livre, deliberada no konsientemente, hatene katak, lori liman tuku ho makas dala ida kona iha ofendida nia ulun fatuk, lori liman basa ho makas dala ida kona iha ofendida nia hasan sorin los, nudar meiu neebe aptu hodi hamosu ofensa ba lezada nia isin lolon no saude.
No konstitui arguidu JdCMdJ, nuudar autor material ho forma konsumadu ba pratika krime ofensa ba integridade fizika simples ho forma violensia domestika ida, previstu no punidu tuir artigu 1450 husi Kodigu Penal konjuga lei Kontra Violensia Domestika n. 007/2010, loron 07 fulan Julhu.
Hatan ba akuzasaun nee, arguidu konfesa ba faktus sira no rekonese katak, hahalok neebe mak arguidu halo nee la diak no arepende tebes.
Aleinde nee lezada MLP deklara katak, iha momentu nee arguidu baku dala ida iha ofendida nia hasan sorin loos, tanba arguidu nervozu.
Hafoin rona tiha deklarasaun husi arguidu no lezada Tribunal kontinua tama ba iha alegasaun.
Iha alegasaun nee, Ministeriu Publiku, husu Tribunal atu aplika pena multa no bainhira arguidu la kumpri mak aplika pena alternativa hodi fo kastigu ba arguidu.
Nune iha alegasaun parte Defeza nia, konkorda ba alegasaun Ministeriu Publiku nian hodi aplika pena multa ba arguidu.
Hafoin rona tiha alegasaun Ministeriu Publiku nian, Tribunal adia ba loron 5 fulan Fevereiru tinan nee, hodi rona desizaun ikus.
Audensia Julgamentu nee prezide husi Juiz singular, José Gonçalvez, Ministeriu Publiku reprezenta husi Prokuradora estajiaria no arguidu hetan asistensia legal husi Defensor Publiku nain ida.
(ter)
