DILI, STLTIMORLESTE.com – Relasiona ho moras dengue neebe kontinua sae, oras nee daudaun pasiente neebe bá halo tratamentu iha Sentru Saude Komoro (SSK) barak mak hetan rujukan husi mediku sira hodi forma hasai raan iha laboratoriu sentru saude refere, tanba barak mak mai ho moras isin manas, ulun moras no muta.
Tuir observasaun diariu nee nian iha Kinta (22/01/2026), pasiente barak mak hamrik no tur forma hodi hein hasai raan iha laboratorium sentru saude nee nian. Depois Sira halo konsulta ho doutor sira, barak mak simu rujukan hodi koko ran iha laboratorium sentru saude nee.
Pasiente neebe barak liu koko hasai raan, kuaze labarik kiik oan mak pozitivu dengue.
Aleinde hasai raan, iha pasiente balun mak hetan rujukan husi pesoal saude hodi koko urine no kaben tasak iha laboratoriu refere, relasiona ho moras neebe sira konsulta bá.
Entretantu iha sala emerjensia nian labarik kiik oan barak mak baixa hela iha kama leten, tanba moras dengue neebe deteta husi raan neebe hasai iha laboratoriu nee.
Tuir pesoal saude neebe la temi naran hatete, sentru nee pasiente sira moras dengue barak los. Labarik kiik barak mak baixa iha emerjensia nee.
“Ami nian nee dengue barak los,” dehan nia bainhira dada lia ho diariu nee iha sala konsulta.
Iha fatin hanesan, Pasiente Merita da Silva dehan, nia lori nia oan neebe isin manas no muta mai konsulta iha nee no doutor sira haruka hasai raan mak pozitivu dengue hodi haruka baixa iha nee.
(dom)
