BAUKAU, STLTIMORLESTE.com – Autoridade Munisipiu Baukau liu husi ekipa jestaun merkadu muda ona negosiante hamutuk 36 iha merkadu Vila Antiga ba merkadu Munisipal Baukau.
Negosiante Vila Antiga, Jacinta Ximenes sente triste ho politika Autoridade Munisipiu Baukau neebe muda negosiante sira husi merkadu Vila Antiga ba merkadu Munisipal iha Tuanau Baukau Vila, tanba Autoridade Munisipal seidauk iha kondisaun kria merkadu diak ba negosiante sira atu halao negosiu iha merkadu refere.
“Lori ami ba merkadu leten ami triste, tanba iha merkadu neeba la besik populasaun, kareta mos sae ba araska terminal mos laiha,” hateten Jacinta Ximenes ba jornalista sira iha eis fatin merkadu Vila Antiga Baukau, Sesta (23/01/2026).
Negosiante nee konsidera, merkadu refere dook husi kompradores no diresaun estrada husi rotunda Vila Nova ba merkadu refere daudaun kondisaun aat hodi difikulta transporte publiku sira tula kompradores ba merkadu refere atu sosa sasan neebe vendedor sira faan.
Nia katak, merkadu Munisipal refere dook husi komunidade kompradores rezulta vendedores sira la hetan rendimentu diak.
“Ami nia pendapatan iha Vila Antiga diak liu, maibe iha merkadu Munisipal susar liu, tanba ami nia kolega sira ba iha merkadu Munisipal nee araska faan sasan lakon hotu balu mai fila fali faan iha bundaran Vila Nova nian,” negosiante Jacinta espresa.
Iha fatin hanesan negosiante Olinda dos Santos sente trisre ho komprimisiu ekipa Jestaun Merkadu Munisipal Baukau neebe katak, merkadu Munisipal Baukau kondisaun seguru ona, tanba ekipa estabelese ona fatin negosiu nian ba kada negosiante sira husi Merkadu Vila Antiga, maibe realidade fatin negosiu nian neebe ekipa Jestaun Merkadu Munisipal Baukau entrega ba negosiante Vila Antiga ho kondisaun mamuk, tanba seidauk iha baraka ba negosiante sira.
“Ami too iha neeba rai mamuk hela, fatuk boboot deit mak sira ateru rai mutin oituan deit ba leten ami ba kee mos aisuak la tun, sira la halo ami nia barak rai molik hela, fatuk boboot deit mak sira dehan se nia bor mak iha lori ba bor ami bor laiha neebe sira haruka kee deit ai suak deit la tun sira mai obriga loos ami hakarak ga lakohi tenke ba merkadu seguru,” Olinda katak.
Negosiante nee konsidera merkadu Munisipal Baukau seidauk seguru ba negosiante sira atu faan, tanba negosiante neebe antes nee muda uluk ona ba merkadu refere iha tempu loraik faan fali iha eis merkadu rotunda Vila Nova Baukau, tanba kestaun rendimentu.
Hatan ba kestaun nee, Diretor Servisu Munisipal Jestaun Merkadu Baukau, Jeronimo Freitas hateten, prosesu muda negosiante sira husi merkadu Vila Nova, Braskem no Vila Antiga ba merkadu Munisipal Baukau hetan dezisaun kolektiva husi Autoridade Munisipal, tanba nee ekipa Jestaun Merkadu Munisipal apoiu sukar rai ba negosiante sira atu harii rasik nia baraka, laos ekipa jestaun mak atu harii baraka ba negosiante sira.
“Fatin ba sira ami haruka kompanhia ateru ona depois sira ba halo sira nia baraka ami akompanha kada negosiante hetan fatin medida 2X3,” Jeronimo katak.
Entretantu negosiante sira husi eis merkadu Vila Antiga neebe muda ba merkadu Munisipal Baukau hamutuk 36 kompostu faan modo 30 no faan ikan 6.
(alb)
