SUISA, STLTIMORLESTE.com – Prezidente Republika (PR), Jose Ramos Horta konvida Prezidente Konselhu OSF Alexander Soros vizita Timor Leste.
Prezidente Republika Jose Ramos Horta konvida konvida Prezidente Konselhu OSF, Alexander Soros vizita Timor Leste iha ambitu partisipa enkontru Anual Forum Ekonomiku Mundial (WEF) tema Espíritu Dialogu nian, konvoka líder global sira husi Governu, empreendedor no sosiedade sivíl hodi partilla dezafiu jeopolítiku, ekonomiku no ambiental sira neebe urjente iha Suisa, Kuarta lokraik (21/01/2026).
Bainhira remata partisipa forum Prezidente Republika Jose Ramos Horta halo enkontru ho Prezidente Konsellu OSF Alexander Soros hodi husu apoiu ruma tulun media sira iha Timor Leste neebe presiza tulun alende nee Prezidente konvida Soros atu vizita mos Timor Leste nunee bele hetan mos rekoinesementu ruma husi estadu.
“Hau hakarak nia mai vizita Timor Leste, para ita rekoinese se mai nia rasik mak mai nia pai labele mai tanba idade ona, no nia hakarak vizita duni tempu besik nia sei ba,” katak Prezidente Republika,” ba jornalista iha Davos kuarta kalan (21/01/2026).
Alende nee Prezidente Republika, Jose Ramos-Horta, hasoru malu Alexander Soros, Prezidente Konsellu Open Society Foundations (OSF), iha ambitu husi Forum Ekonomiku Mundial iha Davos, Suisa.
Iha sorumutu nee, Prezidente hatoo ninia agradesimentu ba apoiu durante dekada barak neebe fundasaun nee no ninia fundador, George Soros, fo ona, neebe kleur ona defende valor demokratiku sira no liberdade imprensa nian iha Timor Leste no mos iha mundu tomak.
Foku prinsipal husi diskusaun nee mak dezafiu sira neebe setor mídia hasoru agora iha Timor-Leste. Prezidente Ramos-Horta entrega rasik karta ida husi jornalista lokal sira neebe esplika ho detalhu sira-nia difikuldade, no fahe dokumentu nee direta ba Soros liuhusi WhatsApp. Ho resposta neebe pozitivu ba Prezidente ninia advokasia, Prezidente Konsellu OSF nee kompromete atu fo apoiu hodi hametin kbiit mídia nian no proteje liberdade imprensa.
Atu hametin liu tan parseria nee, Prezidente konvida ofisialmente Alexander Soros atu vizita Timor-Leste hodi onra ninia aman nia kontribuisaun no haree rasik nasaun nia progresu. Sorumutu nee mos parte husi misaun luan Prezidente nian iha Davos atu mantein kontaktu internasional iha nível aas no mobiliza rekursu sira ba dezenvolvimentu Timor-Leste nian, liuliu iha kbiit institusional no apoiu ba sosiedade sivíl.
(eme)
