DILI, STLTIMORLESTE.com – Prezidente Republika (PR), Jose Ramos Horta apoiu Humanitariu ba Família Moras Lepra iha Aldeia Osowa, Munisipiu Baukau.
Prezidensia Republika liu husi Unidade Sosiedade Sivil no Assuntu Sosial, lideradu husi Quintiliano Moniz hamutuk ho ekipa, entrega apoiu nesesidade bazika ba família sira neebe moras lepra iha Aldeia Osowa, Suku Tirilolo, Munisípiu Baucau, ho objetivu atu tulun komunidade vulneravel no reforsa solidariedade sosial.
Tuir komunikadu neebe STL asesu Sesta (23/01/2026) hatete apoiu nee fo resposta ba informasaun neebe Prezidensia Republika simu kona-ba kondisaun moris família sira neebe afetadu husi moras lepra. Nesesidade bazika neebe entrega inklui ai-han hanesan fos, mina no mos doce hanesan prezente Natal husi Prezidente Republika, ho mos atributu desportivu ba joven sira iha komunidade refere.
Xefe Suku Tirilolo, Elvino Freitas hatoo agradecementu ba Gabinete Prezidensia Republika, tanba bele too ba sira nia komunidade iha area rural.
“Agradese ba Gabinete Prezidensia Republika, mesmo ajuda oituan ka barak ita Boot sira konsgue too ona iha hau Nia komunidade iha Aldeia Osowa. Benefisiariu sira nee hanesan ema moras Lepra duni”, hateten Autoridade Lokal Elvino Freitas.
Suku Tirilolo kompostu husi aldeia neen Aldeia Lutumutu, Aldeia Betulale, Aldeia Osowa, Aldeia Lialesu, Aldeia Parlamento no Aldeia Caisido, ho total populasaun liu uma kain rihun-10. Maioria komunidade sira nia moris husi agrikultura. Aldeia balun dook husi Villa Baucau no iha tempu bailoro, susar hetan oportunidade rendementu ekonomia tanba kondisaun jeografika fatuk mak barak.
Assesor Sosiedade Sivil no Asuntu Sosial Prezidensia Republika, Quintiliano Moniz, esplika katak ekipa Prezidensia identifika ema moras lepra hamutuk nain-15 iha Suku Tirilolo, depois simu informasaun husi autoridade lokal sira.
“Vizita nee mos parte husi servisu Prezidensia nian hodi haree direta no responde ba komunidade sira neebe presiza tebes liu-liu ba moras Lepra iha fatin nee,” dehan Quintiliano Moniz.
Delegada Aldeia Osowa, Angelina da Costa Belo, hatoo nia agradesementu, mesmu apoiu nee fo prioridade ba família sira neebe moras lepra. Nia rekomenda atu Prezidensia Republika no Governu tau matan nafatin ba komunidade tomak, inklui presiza infraestrutura sosial no espasu desportu ba joven sira.
Iha sorin seluk, Xefe Juventude Aldeia Osowa, Aleixo Assis Belo, hatoo preokupasaun kona-ba situasaun joven sira neebe barak la kontinua estudu tanba limitasaun ekonomia, laiha oportunidade servisu no laiha kampu futebol iha aldeia. Nia espera atu ba futuru Estadu no Governu mos iha planu no programa ba joven iha area rural sira, liu-liu iha sira nia fatin hodi prevene problema sosial no hadia moris komunidade nian.
(eme)
