DILI, STLTIMORLESTE.com – Deputada husi Bankada Partidu Kongressu Nasional Rekonstrusaun Timor (CNRT), Virgina Anabelo kestiona Primeiru Ministru ho nia membru Governu sira uza kareta luxu iha povu nia terus nia leten.
Deputada Virgina Anabelo levanta preokupasaun nee wainhira Komosaum C halao audensia ho Governu hodi diskute kona-ba konta jeral estadu ba tinan 2024 no 2025 iha Parlamentu Nasional, Sesta (23/01/2026).
“Hau hakarak koalia kareta, oras nee sosiedade inklui deputadu sira, ami preokupa los tanba iha tinan 2025 kuandu governu hahu sosa kareta barak no luxu, deskulpa ba termu nee mais senhora Ministra, senhor Vise Primeiru Ministru, kareta ba membru Governu sira nee luxu teb-tebes,” Kestiona Deputada Virgina Anabelo.
Deputada Virgina hatete, se Governu hola kareta luxu sira nee sei fo implikasaun ba Fundu Petroliferu neebe kada tinan Governu foti hodi sustenta estadu nee, tanba manutensaun neebe sei uza ba kareta estadu nee presiza osan boot.
Nia dehan, nia kestiona laos tanba nia laran moras ba Governu sira sosa kareta luxu hodi uza ba servisu, maibe tuir lo-loos nee atu sosa kareta nee presiza haree didiak lai tanba oras nee governu hola kareta ba membru Governu ho eskoltu sira kuaze hanesan deit.
“Ami la hatene atu halo diferensa, kareta ba membru Governu no eskoltu sira mak ida neebe, tanba luxu hanesan deit, eskoltu sira mos sae kareta hanesan Primeiru Ministru sae, hanesan Ministru sae, labele hanoin ami laran moras tanba ami la hetan kareta lae, mezmu tuir loloos ami mos iha direitu ba kareta,” dehan nia.
Deputada nee husu governu atu halo jestaun ba utiliza ba patrimoniu estadu nian, membru Governu utiliza kareta oinsa no kareta ba eskoltu sira mak oinsa, laos atribui kareta ba membru Governu no eskoltu sira hanesan deit, tanba kustu manutensaun ba kareta sira nee presiza orsamentu neebe boot.
“Kareta luxu tebe-tebes senhora Ministra, hau la hatene serake bele lao ho ita nia situasaun real neebe ita nia povu sira hasoru agora nee ga lae? tanba ita lao ba suku sira iha munisipiu sira nee kuitadu ita haree ita nia populasaun sira balun atu hela deit uma mos kondisaun la iha, neebe hau husu por favor hare netik situasaun povu nian,” hakotu nia.
Entretantu membru governu neebe partisipa iha audensia nee mak hanesan Vise Primeiru Ministru no Ministru Koordenador ba Asuntu Ekonomiku no Ministru Turizmu no Ambiente, Francisco Kalbuadi Lay, Ministru Planeamentu Investimentu Estratéjiku (MPIE), Gastão de Sousa, Ministru Petroleu no Rekursu Minerais (MPRM) Francisco Monteiro, Ministra Finansas (MF) Santina Cardoso, Ministru Transportes no Komunikasoins (MTK) Miguel Marques Gonçalves Manetelu nomos Ministru Komersiu Industria (MCI) Nino Pereira.
(alb)
