DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba krime arma proibidu neebe mak komete husi arguidu FdC hasoru lezada OS nuudar nia feen.
Tuir akuzasaun katak, arguidu FdC kondisaun lanu hodi hatete liafuan tolok arbiru no tebe sasan uma laran arbiru deit.
Haree arguidu nia asaun no kondisaun refere, lezada OS hatete ba arguidu katak, lanu nee haree ba tama kuartu toba tiha, hafoin arguidu tama ba kuartu hodi toba.
Liu tiha minutu balun, arguidu husu fali etu ba lezada atu han, tanba nee lezada tau etu ba arguidu hodi han.
Bainhira arguidu han hela etu, arguidu kontinua tolok lezada, tanba nee lezada hatete ba arguidu katak “nusa la han nonok deit tenke tolok tun sae nee”.
Rona lezada nia liafuan refere, arguidu nervozu hodi fakar tiha etu ba rai no arguidu hateten ba lezada katak, “o halimar hau ta mate tiha o”.
Arguidu halai ba foti katana taa lezada, maibe la kona tanba lezada ses aan.
Arguidu uza katana refere taa tan nia subrinhu Ameta, maibe la kona tanba Ameta hakruk tiha.
Tanba nee konstitui arguidu FdC hanesan autor material ho forma konsumada ba krime arma proibidu tuir tuir art. 2/1 aln b), 2 al. f) konjugadu ho art. 20/1 husi lei no 5/2017, loron 19 fulan Abril.
Hafoin lee sai tiha akuzasaun nee, Tribunal koletivu husu arguidu atu hili direitu nonok no direitu koalia, nune arguidu hili direitu nonok, tanba nee Tribunal konsidera katak krime neebe mak Ministeriu Publiku imputa ba arguidu loos hotu.
Nunee, sasin ho inisial D deklara ba Tribunal katak, arguidu nuudar nia tiu, no sasin haree katak arguidu kondisaun lanu, no iha momentu neeba arguidu kaer katana mak lao ba lao mai, nunee lezada tauk entaun ba keixa iha Polisia.
Sasin deklara, durante nee arguidu hemu tua maibe la halo buat ida.
Sasin deklara katak, arguidu kaer deit katana no la se katana ba lezada.
Hafoin rona tiha deklarasaun husi sasin, Tribunal deside tama ba alegasaun.
Nunee iha alegasaun Ministeriu Publiku deklara katak, faktus sira neebe mak Ministeriu Publiku iha akuzasa iha krime rua, krime ameasa no krime Arma branka, tanba nee krime ameasa semi publiku, lei la fo dalan atu arguidu no lezada dame malu.
Maibe iha krime Arma branka la autoriza, tanba nee Tribunal kontinua julgamentu ba krime Arma branka.
Ministeriu Publiku deklara, iha julgamentu nee Lezada hili direitu nonok no lakoi fo deklarasaun ba Tribunal kona ba krime refere, nune Tribunal deside rona sasin.
Ministeriu Publiku husu Tribunal atu kondena arguidu ho pena suspensaun.
No parte Defeza, husu Tribunal atu tetu no kondena arguidu ba krime neebe mak iha.
Hafoin rona tiha alegasaun nee, Tribunal deside muda ba loron 6 fulan Fevereiru tinan nee, hodi rona desizaun ikus.
Audensia Julgamentu nee prezide husi Juiza Julmira Auxiliadora, Ivan Patrocenio, Juiz estajiaria, no Ministeriu Publiku reprezenta husi Prokurador Antonio Tavares, no arguidu hetan asistensia legal husi Defensor Publiku estajiariu nain ida.
(ter)
