DILI, STLTIMORLESTE.com – Portavóz Komando Polísia Nasionál Timor Leste (PNTL), Superintendente Polísia João Belo dos Reis hatete, Kazu insendiu neebe akontese iha Domingu dader, haleu tuku 03:30, ahi han uma ida iha BTN1, Tasi Tolu, no iha akontesimentu nee rezulta sidadaun feto no mane ida lakon vida, prosesu investigasaun sei lao.
Nia dehan, iha dadersan madrugda akontese ahi han uma ida lakon ema nian rua nia vida, tanba nee movimentu husi insendiu iha investigasaun nian laran.
“Kazu nee sei iha investigasaun nia laran, tanba nee ami lábele publika, tanba saida mak akontese insendiu nee,” Portavóz Komando Polísia Nasionál Timor Leste (PNTL), Superintendente Polísia João Belo dos Reis ba jornalista sira iha Komando Jeral PNTL Dili, Segunda (26/01/2026).
Nia esplika, motivu husi insendiu nee PNTL sei buka tuir no halo investigasaun, depois mak foin fo sai ba publiku tanba saida mak insendiu akontese no rezulta sidadaun nian rua nee lakon vida.
Antes nee pesoal bombeiru Alfredo de Jesus Perreira informa, iha Domingu dader haleu tuku 03:30 ahi han uma ida iha BTN1, Tasi Tolu, no iha akontesimentu nee rezultadu sidadaun feto no mane ida lakon vida.
Nia deklara, iha Domingu dader haleu tuku 06:00, sira simu telefone husi Komunidade sira katak ahi han uma iha BTN1 Tasi-Tolu.
Tan nee ekipa bombeirus tun kedas halo intervensaun hodi kombate insendiu nee, no iha akontesimentu nee identifika ema nan rua lakon vida.
“Ami simu informasaun iha tuku 06:00 dader, no ami tun kedas fatin akontesimentu. Hau rasik mak halo kombate, hau la hatene ema ruma iha laran depois de kombate hotu mak hau foin haree hetan vitima nain rua iha laran,” nia hatutan.
Entretantu informasaun neebe STL asesu iha sala Mortoariu HNGV katak, matebian nian rua feto ida mane ida neebe vitima ba insendiu nee seidauk bele autopsia, tanba sei hein dadus kompletu husi Polsia Forensik.
(jen)
