DILI, STLTIMORLESTE.com – Horiseik tuku 07:00 kalan iha konflitu area Tibar nian neebe Grupu Kolimau 2000 provoka no hakilar komunidade sira iha Area Tibar, daudaun nee Polisia Nasional Timor Leste (PNTL) detein ona suspeitu nain 4 ba prosesu investigasaun.
Nia hatete, Grupu Kolimau 2000 neebe partisipa Inaugurasaun Gruta iha Munisipiu Ermera, depois fila mai hakilar komunidade sira iha area Tibar nian hodi hamosu konflitus, maibe suspeitu nain haat detein ona iha sela Komado PNTL Munisipiu Likisa hodi halao investigasaun.
Nia dehan, horiseik iha akontesimentu konflitus iha area Tibar nia, konfiltu nee entre Kolimau 2000 ho Komunidade sira iha Tibar.
Nia tenik, rezultadu konflitus nee Kolimau 2000 fila husi Munisípiu Ermera no sira hakilar malu ho komunidade sira neebe hela iha area Tibar nian, no rezultadu husi konfiltus nee kareta ida hetan estragus no komunidade nia uma ida sira sunu nomos uma tolu hetan estragus
“Asaun Polsia nia iha terenu suspeitu nain haat (4) ami kaptura, husi parte rua hotu neebe mai ho evidência samurai no tudik neebe sira lori hodi asalta malu,” hatete Portavóz Komandu Polísia Nasionál Timor-Leste (PNTL), Superintendente Polísia João Belo dos Reis ba jornalista sira iha Komando Jeral PNTL Dili, Segunda feira (26/01/2026).
Nia esplika, kazu konflitus iha Tibar nian prosesu investigasaun lao hela, maibe suspeitu sira neebe involve iha laran PNTL sei kaptura hotu hodi responsabiliza ba aktu sira neebe sira halo.
“Ita Membru Polisia sira iha Munisipiu Likisa halao hela sira nia servisu no sei rekolha informasaun hotu-hotu no enkoraza mos ba vitima sira para bele halo relatoriu ba Komando Munisipiu Dili nian,” nia Informa.
Nia koalia, wanhira akontese konflitu nee UEP nomos F-FDTL apoiu ba Komando PNTL Munisipiu Dili atu hakalma situasaun no hodi kaptura suspeitu sira neebe involve iha konfiltus sira nee.
“Suspeitu nain haat neebe ami detein ona iha Komando PNTL Munisipiu Likisa nian, nomos haree iha akontesimentu nee iha sidadaun mane ida maka hetan tuda,” nia koalia.
Entretantu informasaun neebe STL rekolha iha terenu katak, Polisia Nasional Timor Leste (PNTL) kaptura suspeitu nian haat ho inisial SBS, idade 17 anos hela fatin iha Tibar Lebolema, no DR idade 30 anos hela fatin Tibar, Lebulema, depois suspeita husu Kolimau 2000 nian inisial MDF neebe hela iha Lisadila, Aldeia Nuno Lisa nomos suspeitu ho inisial SDS hela fatin Motaulun, Mauluto dadaun nee sira detein hela iha sela Komando PNTL Munisipiu Likisa nian.
(jen)
