DILI, STLTIMORLESTE.com — Governu hahu fo atensaun duni ba Kristu Rei neebe sai fatin primadona turizmu relijioza iha kapital Dili. Kristu Rei husi loron ba loron, tinan ba tinan hahu iha mudansa no hatudu nia performa nuudar fatin turizmu neebe bonita no atraktivu maske sei sepi.
Konstrusaun estrada iha area neebe daudaun lao hela, no deskamentu grupu ka ekipa saniamentu lubun ida iha area kristu rei, ho kooperasaun rutina parte seguransa kristu rei nian ho Polisia Nasional Timor Leste (PNTL), garantia duni ambiente iha kristu rei mos, bonita no seguru ba vizitante sira, nunee kristu rei sei sai fatin destinadu ba turismu iha futuru.
Agapito Inacio da Costa dehan, kristu rei fatin neebe seguru ba familia, joven, estudante, grupu sira neebe hakarak pasa sira nia tempu mamuk ou halao sira nia atividade fora husi ambiente sidade nian. Vizitante sira iha nee laos loron deit, kalan boot mos joven sira mai iha nee kanta, hemu, dansa, laiha ema ruma book sira.
Vizitante sira mos hatene an kuandu mai iha nee han dan hemu, lixu sira tau iha lixeiru sira neebe governu prepara, tanba nee mak lixeiru sira mak forma hela iha estrada ibun, no foer la naklekar arbiru.
“Iha nee so kalan deit, mak labele kontrola, tanba sira mai iha nee hemu too kalan boot, sira fila lixu sira husik hela, hanesan kalen, agua, plastika, mas iha nee ekipa sanimentu lubun ida ida preparadu atu hamos,” dehan Agapito ba STL iha Kristu Rei, Segunda (26/1/2026).
Nia dehan kristu rei iha loron sabadu no domingu nakonu ho ema, atividade ema sira mai iha nee balu ba reza, balu haris tasi, balu halimar ho familia, balu halo ezersisiu, sae ba leten tun mai, balu fali halai ba dolok oan hodi hasai kosar. Klosan sira ho namoradu tuur deit iha too kalan foin fila.
“Ami hare deit, kontrola atu ambiente iha areador kristu rei nian mos no seguru, tanba ita hakarak kristu nee sai fatin ida lindu, laos lindu iha ambiente sira maibe lindu iha fuan no klamar,” nia komenta.
Agapito hatete nia servisu hanesan seguransa konstrusaun estrada ba Dolok oan nian desde 2024 liu ba too agora kontinua, no seidauk remata, observa katak komunidade ka vizitante sira tama iha areador kristu rei nian disiplina los, la soe lixu arbiru, iha vizitante ida husi Korea do Sul sai inspirasaun ba ema timor oan sira atu koida ambiente moos no seguru.
“Ita inan aman sira dalaruma moe hili foer, inan ida husi korea nee lao iha dalan, hetan foer hili tutuir dalan hodi ba tau iha lixeiru, nee admira no sai lisaun, ema estranjeiru mai hili fali foer, ita fali lekar arbiru, nee ita moe ka lae,” komenta Agapito.
Nunee mos Domingos Fatima dehan, kristus Rei presiza fo atensaun masimu duni nunee bele atrai ema estranjeiru sira mai vizita Timor Leste, atu atrai turista lokal no estranjeiru tenke hare mos ba atividade entertaiment sira neebe hatudu duni identidade timor nian, neebe ema mai laos hare liu kristu rei fila deit, mas bele aprezenta mos entertaiment sira ba vizitante sira.
Domingos hatete areador kristu rei nee luan, presiza iha mini resto neebe nia menu nee reprezenta husi nasaun bar barak ka nasaun sira neebe nia sidadaun sira barak mai vizita Timor Leste, nee laos atu halo uma, mas hanesan baraka provizoriu sira, neebe kuandu familia ruma mai, kontaktu deit, buat hotu preparadu, mai uza deit.
“Nee ministeriu turismu nia servisu, oinsa atu husu restorante sira marka prezensa mos iha nee, hodi atende ema sira neebe mai iha nee, klaru kee lakon mas se atu promove ita nia turismu, tenke halo, governu iha osan atu halao ida nee,” nia hatete.
Atividade seluk hanesan arte moris sira, tuir nia bele orienta sira mai iha nee nunee kristu rei rame helaa deit, no fo valor boot atu atrai turista tantu rai laran nomos rai liur.
(god)
