DILI, STLTIMORLESTE.com — Komunidade Munisipiu Ainaro kontente ho reabilitasaun estrada Ainaro Vila neebe lao daudaun.
Ministeriu Obras Publika hamutuk ho Prezidente Auroridade Munisipiu Ainaro iha loron hirak liuba halo ona lansamentu ofisial ba reabilitasaun estrada Ainaro Vila neebe aat grave.
Tuir Lorenco da Costa governu kontratu ona ho kompania 5 foku ba halo reabilitasaun estrada ainaro vila, oras nee ekipamentu pezadu sira hahu suru daudaun fatuk sira nakrakat iha estrada laran hodi ba tau tiha iha fatin dook, balu hahu halo kaber daudaun hodi fasilita movimentu transporte komunidade sira nian, balu kee, balu suru daudaun, balu lalin.
“Kompania lima nee halo konstrusaun husi diresaun oin-oin, neebe rame los, no komunidade kontente tanba kleur ona mak sira hein estrada nee,” dehan Lorenco ba STL iha areador Ministeriu Asuntu Kombatente Libertasaun Nasional, Segunda (26/1/20226).
Nia hatete Fortuna Star desde semana hirak liu ba halao ona atividade iha mota maumali nian nudar baze ba kompania hodi halo kontrusaun ba estrada Ainaro vida. Nunee mos kompania sira seluk mobiliza sira nia ekipamentu pezadu sira daudaun hahu sobu, kee daudaun estrada.
Nia dehan reabilizasaun estrada vila iha mos alargamentu ba estrada, nunee estrada sira uluk klot, agora loke luan tan, nunee bele halo mos drainajen no trotoar. Se foku deit ba estrada tuan, estrada klot nafatin, kareta rua atu ses malu araska.
“Agora estrada luan los, eksa sobu estrada nee ita hare luan los, kleuk laiha, so ba iha fatin klean sira sei foti aas ka nusa, nee ita seidauk hatene, tanba foin hahu, se foti aas hanesan ho rai, nee ita hare loos no borus, husi estrada boot ita haree borus to leten area nugfu nian,” nia komenta.
Lorenco dehan kualker partidu neebe kaer ukun, povu nia manan mak dezenvolmentu, estrada diak, povu lao ba mai ho kontente, buat seluk povu la ejize, tanba buat prinsipal liu ba estrada, saude, seguransa, osan nee povu bele buka rasik.
Timor Leste tuir nia laos hanesan uluk, buka osan araska, ohin loron, tur iha estrada mos hetan osan, nee depende ba ema ida idak esforsu oinsa atu buka osan, toba hela deit mak la hetan osan, mas badinas oituan, osan barak.
Nunee mos Venancio da Costa dehan, munisipiu Ainaro la kleur tan sai sidade furak, tanab estrada diak ona, ema ida idak komesa ordena nia uma oin ho jardin nee diak no halo Ainaro sai furak.
“Ema atu halo jardin duvidas hela ba estrada , kuandu estrada halo ona, ema komesa tata nia uma oin ho aifunan no atividade sira seluk neebe halo ainaro sai sidade ida furak,” tenik Venancio.
Joven nee apresia no louva Prezidente Atoridade Munisipiu Ainaro, Senhor Manuel G. Carmo Bukar, neebe durante nia governu lori mudansa signifikante ba dezenvolmentu munisipiu Ainaro, estrada iha, irigasaun maununu halo daudaun, ponte mauleu iha faze konstrusaun, estrada liga ba postu sira komesa lansa ona.
“Administrador sira uluk nee servisu manan osan deit, tanba nee mak rai orluli husu sira nia isin, susu tiha orluli nia bokur abandona tiha, laiha dezenvolvimentu, povu hakilar, rai nain sira mos hakilar ikus lori isin selu,” nia komenta.
Nia dehan hili lideransa nee tenke hili ema neebe los, ema neebe iha interese atu dezenvolve nia rai, hakarak nia rai sidade hanesan rai sira seluk, hili lideransa so manan deit osan, neebe mak akontese iha tinan hirak liu ba, minisipiu sira seluk nia rai sidade, munisipiu ainaro estrada hanesan mota laran.
“Hau laiha duvidas ba PAM Ainaro, nee ema ukun an nian, nia pai delegadu Fretilin 1975, PAM Ainaro iha erensa nasionalismu nia pai nian atu haree ainaro sai sidade,no hahu iha ona progesu,” nia tenik.
(god)
