DILI, STLTIMORLESTE.com – Ministra Edukasaun, Dulce de Jesus Soares akompana husi Diretora Nasional Ensinu Báziku Esterlita Soares halao vizita supreza ba Eskola Ensinu Báziku Filiál Siklu 1 no 2 Aidak Bihare, Postu Administrativu Kristu Rei, Munisípiu Dili.
Liu husi informasaun neebe STL sita husi pajina ME, Kuarta (28/01/2026) hatete, vizita surpreza nee halao iha loron (26/01/2206).
Hafoin observa prosesu aprendizajen Ministra Edukasaun Dulce de Jesus Soares hatete, vizita ida nee atu haree no observa direta prosesu aprendizajen estudante sira nian iha eskola refere, tanba fulan ida- nee hanesan inísiu ba prosesu aprendizajen ba tinan ida nee nian.
‘‘Estudante barak maka dala ruma profesór/a sira bainhira la fó atensaun maka estudante neebe hatene, nafatin hatene maibé ida neebe lahatene no kontinua lahatene,”tenik Ministra.
Governante nee argumenta, baze ba edukasaun maka estudante husi klase 1 no 2, tanba nee iha klase 1 no 2 profesór/a sira tenki harii baze solidu tebes-tebes ba estudante nia literasia no numerasia.
Enkuantu iha observasaun nee hatudu, estudante sira nia partisipasaun masimu tebes-tebes iha matéria neebe profesór/a sira hanorin iha turnu dader nian.
(dom)
