DILI, STLTIMORLESTE.com – Prezidente Republika (PR), Jose Ramos Horta halo enkontru bilateral ho Primeiru Ministru (PM) Australia, Honoravel Anthony Albanese, diskute hamutuk oinsa hametin diversifikasaun ekonomika no seguransa maritima no dezenvolvimentu kapital umanu.
Enkontru nee halao iha Palasiu Prezidensial Nicolau Lobato, Bairo Pite, Kuarta nee (28/01/2026).
Iha enkontru nee, Prezidente Ramos Horta hatoo Timor Leste nia agradesimentu klean ba Australia nia apoiu konstante ba dezenvolvimentu iha setor oioin.
“Diskusaun sira foka ba hametin kolaborasaun iha diversifikasaun ekonomika, seguransa marítima no dezenvolvimentu kapital umanu,” dehan PR Horta.
Iha enkontru nee líder sira reafirma sira nia kompromisu atu reforsa mobilidade traballador nian iha ambitu programa Pacific Australia Labour Mobility (PALM) no promove kooperasaun iha materia seguransa nian, iha ambitu akordu bilateral 2022 nian, neebe abranje formasaun iha materia defeza nian no hametin kapasidade polísia nian.
Diskusaun sira seluk sublia apoiu ba kreximentu setor privadu no projetu estratejiku boot sira, inklui dezenvolvimentu Greater Sunrise.
Enkontru nee konklui ho troka prezente entre líder nain rua nee. Iha parte lorokraik, Prezidente Ramos Horta konfere ba Primeiru Ministru Albanese Grande Colar da Ordem de Timor Leste, kondekorasaun aas liu iha nasaun, nuudar rekoesimentu ba nia dedikasaun hodi hametin lasu bilateral sira.
Reflete kona-ba parseria nee, Prezidente J. Ramos Horta deklara “Timor Leste no Australia laos viziu deit ita nuudar família. Ita-nia istoria neebe fahe, valor komun no ita nia kompromisu ba pas no prosperidade halibur ita. Ohin, ita reafirma ita-nia promesa atu lao hamutuk rumu ba futuru ida ho seguransa, oportunidade no amizade neebe dura ba tempu naruk.” Dehan PR Horta.
Timor Leste no Australia estabelese relasaun diplomatika formal iha tinan 2002. Ohin loron, parseria nee abranje kooperasaun polítika, ekonomika, seguransa no sosiu-kultural, hodi reflete vizaun neebe fahe ba rejiaun ida neebe estavel, prosperu no iha ligasaun.
Aleinde iha Kuarta nee Prezidente Republika Jose Ramos Horta simu Primeiru Ministru Australia, Honoravel Anthony Albanese, iha vizita ofisial loron rua mai Timor Leste.
Vizita nee hatudu parseria neebe dura ba tempu naruk entre nasaun rua nee. Prezidente Ramos Horta hamutuk ho Primeiru Ministru Gusmão, Vise Primeiru Ministru sira, membru Governu no korpu diplomatiku sira, simu Primeiru Ministru Albanese bainhira too iha Aeroportu Internasional Nicolau Lobato ho serimonia benvindu tradisional Timoroan nian.
Iha jestu ida neebe reflete lasu pesoal sira amizade nian, Prezidente Ramos Horta lori nia veíkulu eletriku Moke husi aeroportu too iha Palasiu Prezidensial Nicolau Lobato, akompanha husi Primeiru Ministru Albanese no Primeiru Ministru Xanana Gusmão.
Iha Palasiu Prezidensial, Primeiru Ministru Albanese simu ho serimonia ofisial benvindu nian, neebe inklui hino nasional sira hosi nasaun rua, inspesaun hosi Guarda Honra nian no aprezentasaun husi delegasaun sira hosi nasaun idak-idak. Líder nain rua nee ba iha Salaun ASEAN hodi halo asinatura ba livru bainaka nian no fotografia ofisial ida, tuir kedas ho enkontru entre líder nain rua nee, akompanha husi sira nia membru delegasaun sira.
(eme)
