DILI, STLTIMORLESTE.com – Relasiona ho desizaun Tribunal Judisial Primeira Instansia Dili (TJPID) ba kazu Armandino Lemos Soares nia mate, hodi halo kedan alterasaun ba medida husi Aprezentasaun Periodika (AP) ba iha Prizaun Preventiva (PP), defeza konsidera Tribunal liu husi Juiz sira la fundamenta ho diak.
“Razaun halo alterasaun nee husi parte defeza mos hare katak, Tribunal la iha fundamentasaun neebe diak, tanba durante nee iha prosesu inkeritu arguidu sira sempre kolabora, iha Tribunal mos arguidu sira sempre kolabora tuir julgamentu,” dehan Advogadu Pedro Aparicio ba STL iha Kaikoli, Kuarta (28/01/2026).
Nia hatutan, la iha razaun ida sira atu halai, la iha razaun ida perturba investigasaun, la iha argumentu ida katak arguidu sira halo tan krime ruma, tanba iha tinan ida naruk tebes, sira iha liur la komete krime.
Nia sublina, arguidu sira nia hela fatin klaru, se Juiz muda fali medida Aprezentasaun Periodika iha Polisia ba fali iha Prizaun Preventiva, ida nee hanesan desizaun neebe Tribunal mak tauk liu fali.
Defeza la aseita ho medida neebe Tribunal aplika, tanba iha kazu barak arguidu sira iha liur desizaun Tribunal tun, maibe husi parte defeza sei halo rekursu desizaun nee sei suspende.
Maibe ba kazu ida nee Tribunal haree fali arguidu sira hanesan sidadaun estranjeiru atu halai mak sira foti desizaun ida nee, tanba nee konsidera desizaun Tribunal nian dala barak hamosu polemika, tanba nee mak husi sosiedade politiku sira sempre haree desizaun Tribunal hamosu polemika.
“Hau sei hatoo rekursu ba iha TR, Juiz sira tenke fo desizaun neebe liu husi fundamentasaun neebe diak, labele tanba deit sira nia tauk. No dala ruma iha desizaun sosiedade sira halo reajen, depois mak sira foti desizaun sira neebe rigorozu. Tribunal tenke foti nia desizaun bazeia deit ba lei, laos bazeia ba ema politiku no sosiedade nia hakarak, tanba nee defeza sei hato rekursu ba iha TR”, dehan nia.
Antes nee Tribunal Judisial Primeira Instansia Dili (TJPID) liu husi desizaun kondena arguidu nain neen, pena prizaun tinan sanulu resin hitu (17) ba arguidu CdCSG, no arguidu nain lima MX, BdRG, LVS, MAS no HdJF Tribunal deside kondena prizaun tinan sanulu resin lima (15).
Iha sala julgamentu laran, Juiz prosesu Zulmira Auxiliadora deklara katak, desizaun Tribunal nian sai ona, maibe arguidu sira iha hela liur, atu asegura arguidu sira Tribunal halo kedan alterasaun ba medida neebe antes nee arguidu sira hetan ona.
“Desizaun tun ona, sei halo kedan alterasaun ba medida neebe iha,” dehan Juiza.
Ho ida nee Tribunal deside hodi halo kedan alterasaun ba iha medida, husi Aprezentasaun Periodika (AP) ba iha Prizaun Preventiva (PP). No husi medida nee arguidu sira iha Prizaun, hodi hein prosesu nee to iha tranzitu Injulgadu.
Momentu neeba, autoridade seguransa lori kedan arguidu nain neen ba iha Prizaun Bekora.
(ter)
