DILI, STLTIMORLESTE.com – Polísia Nasionál Timor Leste (PNTL) liu husi Komando PNTL Munisípiu Dili fo segurasan masimu ba vizita Primeiru Ministru Austrália, Anthony Albanese durante iha Timor Leste TL.
Hatete Komandante PNTL Munisípiu Dili, Superintendente Xefe Polísia Orlando Gomes ba jornalista sira iha nia knaar fatin Komando PNTL Munisipiu Dili, Kuarta (28/01/2026).
Nia dehan, antes Primeiru Ministru Austrália seidauk iha Timor Leste, Komando Munisípiu Dili hetan ona diretiva operasional husi Komando Jerál, no Komando Munisípiu Dili prepara ona nia planu espesifiku liu-liu tátiku sira neebe mak atu implementa iha terenu atu asegura vizita Primeiru Ministru Austrália mai no fila hodi diak.
“Ita koloka ona ita nia membru sira tuir planu neebe mak Komando Munisípiu Dili iha, Komando Munisípiu Dili sei hetan apoiu husi Unidade Espesiál Polísia husi Unidade Polisia Máritima no UPF neebe destaka iha Aeroportu no mos husi ita nia forsa F-FDTL, tanba nee atu asegura ita nia Primeiru Ministru Austrália mai Timor Leste lao diak,” nia tenik.
Nia esplika, tuir planu seguransa aban PNTL sei hatun membru hotu iha terenu para atu bele halo seguransa ba vizita Primeiru Ministru Austrália, nunee iha vizita nee bele lao diak, lao ho susesu.
“Rute neebe mak Primeiru Ministru Austrália sei liu mak husi Aeroportu dalan protokolu, ida nee ita sei koloka membru sira para atu ba fo seguransa masimu ba fatin sira nee, nunee mos dalan Palásiu Prezidente, Palásiu Governu no Parlamentu Nasional no ita prontu para atu asegura dalan sira nee no ita mos sei halo patrulhamentu para hodi haree kona-ba kestaun seguransa neebe mak diak”, nia Informa.
Hatan kona-ba posibilidade rute sira neebe Primeiru Ministru Austrália sei blokeia, Komandante Orlando Gomes hateten, nee depende ba situasaun iha terenu mak bele justifika katak iha rute balun bele blokeia iha balun labele blokeia.
(jen)
