DILI, STLTIMORLESTE.com – Prezidente Republika (PR), Jose Ramos Horta kondekora Primeiru Ministru Australia Anthony Albanese ho medalha Grande Colar Ordem de Timor Leste, nuudar rekonhesimentu ba nia dedikasaun hodi hametin lasu bilateral.
Iha loron Kuarta lokraik (28/01/2026) Prezidente Republika Jose Ramos Horta kondekora medalha Grande Colar de Ordem de Timor Leste ba Primeiru Ministru Anthony Albanese iha Palasiu Prezidensial nuudar rekonhesimentu ba nia dedikasaun hodi hametin lasu bilateral.
Iha biban nee Prezidente Republika Jose Ramos Horta liu husi nia diskursu hatete, kondekorasaun Ordem nasaun, nuudar aas liu iha rekonhesimentu ba Primeiru Ministru Albanese nia dedikasaun hodi hametin lasu bilateral sira.
Prezidente Republika hatete, Timor Leste no Australia laos vizinhu deit maibe nuudar família. Iha istoria neebe fahe, valor komun no kompromisu ba pas no prosperidade halibur.
“Ohin ita reafirma ita nia promesa atu lao hamutuk rumu ba futuru ida ho seguransa, oportunidade no amizade neebe dura ba tempu naruk,” dehan PR Horta.
Iha biban nee Prezidente Republika hatete, privilejiu boot ida atu hamutuk hodi kondekora Primeiru Ministru Australia. Ohin nee momentu ida ho signifikadu espesial, laos deit atu fo onra ba distintivu ida, maibe mos atu reflete kona-ba relasaun ida neebe mak forma ona husi istoria.
Iha biban nee Prezidente Republika hatutan, Timor Leste ho Australia fahe valor komun no kompromisu ba pas no prosperidade halibur. Ohin reafirma promesa atu lao hamutuk ba futuru ida ho seguransa, oportunidade no amizade neebe dura ba tempu naruk.
Nunee mos Primeiru Ministru Australia Anthony Albanese hatete, ho ondra tebes mai hamutuk hodi simu kondekorasaun husi estadu Timor Leste.
“Hau haraik aan tebes. atu simu Honra estraordinariu ida-nee iha ema ida maibe mos hanesan parte ida hosi Australia, No hau fo hau nia agradesimentu sinseru ba povu no estadu neebe rekoinese no fo ona kondekorasaun ba hau,” dehan Primeiru Ministru Australia.
Serimonia Kondekorasaun nee marka prezensa husi Primeiru Ministru Kay Rala Xanana Gusmão, Prezidente Tribunal Rekursu, Prezidente Parlamentu Nasional, Eis Prezidente Republika Taur Matan Ruak, Membru Governu, membru Parlamentu Nasional, Korpu Diplomatiku no partisipante seluk.
(eme)
