DILI, STLTIMORLESTE.com – Primeiru Ministru (PM), Kay Rala Xanana Gusmão simu eis Governante Estanislau da Conceição Aleixo Maria da Silva iha Palasiu Governu, hodi troka opiniaun kona-ba dezenvolvimentu no situasaun jeral iha rai laran.
Hasoru malu entre Primeiru Ministru ho Estanislau da Silva nuudar kontinuidade husi hasoru malu tinan kotuk nian iha Dili.
“Tinan 2025 Primeiru Ministru ami hasoru-malu ona, koalia kona-ba asuntu balun. Ohin hau mai hanesan enkontru kontinuidade. Hau mai koalia nuudar Timoroan ida neebe mos luta ba ita nia ukun aan. Hau mos rona opiniaun Primeiru Ministru nian kona-ba ita-nia rain liu-liu kona-ba dezenvolvimentu. Primeiru Ministru kontente ho enkontru ida nee,” Estanislau da Silva hateten liu husi nota komunikadu imprensa neebe STL asesu husi media Gabinete Primeiru Ministru, Sesta (30/01/2026).
Iha mos asuntu balun neebe diskute hamutuk ho Xefe Governu, maibe labele koalia ba publiku no jeralmente reuniaun lao diak tebes.
Estanislau da Conceição Aleixo Maria da Silva kontente ho vizita Primeiru Ministru Australia, Anthony Albanese neebe nia observa katak lao diak tebes.
Pesoalmente Estanislau da Silva konhese diak Primeiru Ministru Albanese tanba iha tempu rezistensia hanesan reprezentante FRETILIN iha Australia hasoru malu dala barak iha reuniaun balun.
(alb)
