BAUKAU, STLTIMORLESTE.com – Servisu Munisipal Saude Baukau rejistu ona kazu dengue hamutuk 43 iha Munisipiu Baukau neebe afetadu maioria labarik kiik.
Xefe Departementu Programa Saude Munisipiu Baukau, Maria Candida dos Reis relata, kazu dengue refere Servisu Munisipal Saude Baukau simu husi Sentru Saude 9 hanesan Sentru Saude Baguia rejista kazu 1, Laga 1, Kelikai 2, Vemasi 4, Ossokeli 11, Uailili 11 no Sentru Saude Venilale 13 neebe rejistu iha inisiu fulan Janeiru tinan 2026 Servisu enkuantu Sentru Saude Bukoli no Tirilolo sei livre husi kazu dengue.
“Husu 40 resin nee tinan 15 mai kraik nee mak barak liu ema boot sira nee la dun barak, husi 40 resin Servisu Saude Baukau seidauk iha lista ba kazu mate,” Maria Candida dos Reis informa ba jornalista sira iha nia knaar fatin Tirilolo Baukau, Segunda (02/02/2026).
Nia sublina, husi kazu dengue nian 43 refere seidauk iha afeta ba kondisaun seluk, maibe hotu hotu transfere ona ba Hospital Rejional Eduardo Ximenes (HoREX) Baukau kontinua halo tratamentu.
Nia konsidera, kazu dengue risku ba ema nia vida, tanba nee Servisu Saude Munisipal halo ona investigasaun ba kazu refere no mos halo fumigasaun iha area afeadu sira hanesan iha Sentru Saude Ossokeli Vemasi, Venilale no area Uailili Postu Baukau Vila.
“Kazu hirak sira nee ita halo hotu ona prevensaun halo promosaun saude, fo abatesisasi ba komunidade inklui mos halo fumigasaun,” Maria katak.
Nia komenta, ba kazu refere Servisu Munisipal fahe ona aimoruk abate ba komunidade sira liu husi tama uma sai uma hodi prevene kazu refere aliende mos nafatin halo promosaun saude ba komunidade sira iha nivel Postu Saude sira hotu iha Baukau atu halo prevensaun ba kazu refere.
Nia komenta, kazu dengue nee mosu, tanba komunidade sira maioria seidauk iha kosensia atu hamoos uma laran no uma ninin liu liu taka malu, bidon mamuk no seluk neebe akumula udan been nalihun bele hakiak susuk hodi transmiti moras refere ba sira, tanba nee husu komunidade sira atu nafatin hamoos uma laran no uma ninin atu nunee ambiente moos laiha espasu ba susuk atu moris.
(tom)
