DILI, STLTIMORLESTE.com – Tribunal Judisial Primeira Instansia Dili (TJPID) halao prosesu primeiru interogatoriu ba arguidu nain rua, ba krime Ofensa Integridade Fisika Grave no krime Arma Branka.
Arguidu nain rua lori mai iha Tribunal, Ministeriu Publiku (MP) promove sira ho krime rua, arguidu DS ho krime Ofensa Integridade Fzika Grave no arguidu EADC ho krime Arma Branka.
Depois halo tiha identifikasaun ba arguidu nain rua, ikus mai Tribunal liu husi Juiz turnu Jose Gonsalves, deside aplika medida Aprezentasaun Periodika (AP) ba iha prosesu rua nee.
Tuir Defensor Publiku, Jose Maria Guterres katak, medida neebe Tribunal aplika justu no adekuadu.
“Iha prosesu rua, prosesu ida arguidu ho naran DS ba iha krime Ofensa Integridade Fisika Grave, hasoru lezadu DC Tribunal deside aplika medida Aprezentasaun Periodika (AP),” dehan Jose ba STL iha Kaikoli, Segunda 02/02/2026.
Nia sublina, iha alegasaun Ministeriu Publiku haree katak la iha perigu de fuga no la iha perturbasaun ba investigasaun, arguidu koopera ho Tribunal no mos MP, tanba nee mak MP husu atu aplika medida Aprezentasaun Periodika.
Mezmu nunee, ikus mai Tribunal deside aplika medida AP, atu arguidu aprezenta aan fulan ida dala ida iha eskuadra polisia neebe hela besik ba no defeza mos aseita ho despaisu Tribunal nian, justu no adekuadu.
Nia hatutan, kazu nee akontese iha Manleuana iha loron 29 oras tuku 11 kalan. Arguidu lori kanuru suru rai maka baku lezadu.
“Kazu segundu arguidu inisial EADC nia mos hetan asaltu husi ema deskonesidu nain lima, ba iha krime Arma Branka nia hetan mos medida Aprezentasaun Periodika (AP),” dehan nia.
Iha alegasaun MP husu Tribunal atu aplika medida Aprezentasaun Periodika (AP) ikus mai Tribunal deside hodi aplika medida AP. No defeza aseita despaisu Tribunal nian.
Prosesu primeiru interogatoriu nee prezide husi Juiz Jose Gonsalves, Ministeriu Publiku reprezenta husi Prokurador Antonio Tavares, arguidu hetan asistensia legal husi Defensor Publiku Jose Maria Guterres.
(ter)
