DILI, STLTIMORLESTE.com – Membru Parlamentu Nasional liu husi Bankada Partidu Demokratiku (PD) preokupa ho atividade komu isin neebe oras nee lao hela iha kapital Dili, tanba bele kontribui ba esplorasaun seksual ba labarik feto ho idade minoridade.
Deputadu Mariano Fernando Malik hateten, oras nee iha fenomeno neebe akontese iha kapital Dili, tanba iha atividade massage komesa loke iha fatin-fatin.
Tuir nia katak, atividade massage nee tenki hetan kontrola husi entidade relavante sira hanesan Servisu Rejistrasaun no Verifikasaun no Emprezarial (SERVE) no servisu imigrasaun, tanba atividade sira hanesan nee bele kontribui esplorasaun seksual hasoru minoridade sira.
“Hau preokupa tanba hau haree iha indisius esploitasaun ba ita nia maluk Timoroan sira liu-liu labarik feton sira neebe mak sei ho idade minoridade, tanba atividade nee laos massage deit maibe iha indisius atividade seluk mos bele lao iha fatin sira nee,” hatete Deputadu Mariano Fernando Malik liu husi plenaria Parlamentu Nasional (02/02/2026).
Deputadu nee husu ba SERVE ho Polisia Imigrasaun atu kontrola didiak vistu neebe mak atribui ba sidadaun estranjeiru sira neebe tama mai iha Timor Leste, tanba balun utiliza vistu lao tuir dalan neebe mak iha.
“Tenki halo kontrola masimu, tanba atividade sira nee bele hamosu esploitasaun ba ita nia inan feton sira liu-liu minoridade sira neebe mak mentalidade sei fraku hela,” dehan nia.
Hatan ba kestaun nee Vise Ministru Asuntu Parlamentares, Aderito Hugo kompromete sei envia preokupasaun deputadu sira nia ba membru governu relavante hodi bele fo resposta imediata.
“Perguntas neebe senhor deputadu sira foti, hau ho hau nia tekniku sira toma nota atu bele envia imediata ba membru governu relevante sira hodi bele fo resposta imediata ba preokupasaun deputadu sira nian,” hatan Aderito Hugo.
(alb)
